«Դա ֆուտբոլ չէր, որ ասեինք, թե գոլն այս րոպեին պետք է խփվեր». Ալեքսանդր Արզումանյանն ուղղաթիռի միջադեպից հետո ՊՆ-ի աշխատանքն անթերի է համարում
Նմանատիպ
ՀՀ պաշտպանության նախարարությունն անթերի է կատարել իր առջև դրված խնդիրը, իսկ արտաքին գերատեսչությունը թույլ է տվել որոշ թերություններ: Այսօր լրագրողների հետ հանդիպմանը հայտարարեց ԱԺ պատգամավոր Ալեքսանդր Արզումանյանն՝ անդրադառնալով ադրբեջանական զինուժի կողմից ԼՂՀ ՌՕՈՒ-ին պատկանող խոցված ուղղաթիռի անձնակազմի դուրսբերման գործողություններին: Միաժամանակ, վերջինը շեշտեց, որ եթե օգոստոսյան դեպքերի ժամանակ ԱԳՆ-ի գործառույթն իր վրա էր վերցրել ՊՆ-ն, ապա այս անգամ ամեն մեկն իր գործն է արել:
«Բանակն ինքը պետք է որոշեր՝ ո՞ր պահին և ի՞նչ պատասխան պետք է տալ հակառակորդին: Դա ֆուտբոլ չէր, որ ասեինք, թե գոլն այս րոպեին պետք է խփվեր: Մեր պատասխանը ժամանակ և նախապատրաստություն էր ենթադրում: Ինչ վերաբերում է դիվանագիտությանը, այն այնպիսի կատեգորիա է, որ բոլոր դետալներին չենք տիրապետում և պետք էլ չէ, որ տիրապետենք: Այսինքն՝ կուլիսների հետևում դիվանագետներն ավելի շատ աշխատանք են տանում, քան հայտարարություններում»,-շեշտեց պատգամավորը:
Անդրադառնալով միջազգային արձագանքին, Ալեքսանդր Արզումանյանն ընդհանուր առմամբ այն ադեկվատ համարեց:
Հակադարձմանը՝ չե՞ք կարծում, որ Ադրբեջանի պահվածքը հետևանք է միջազգային հանրության անհասցե հայտարարությունների, նախկին արտգործնախարարը համաձայնեց՝ իհարկե, ցանկալի կլիներ, որ միջազգային հանրությունը դատապարտեր, նույնիսկ՝ Ադրբեջանին Հաագայի դատարանի առաջ կանգնացնեին. «Բայց պետք է հասկանանք, որ միջազգային հանրության դարդն ու ցավը չի կտրվել, որ կողմերից մեկին պատժի»,- լրացրեց նա՝ նկատելով, թե հայտարարությունների տողատակում, այնուամենայնիվ, երևում էր մեղավորն ու կոչերի հասցեատերը. «Կողմնակալ լինելը ճիշտ չէր լինի, կարծում եմ՝ խիստ ձևակերպումներ կային, որոնք մինչ այդ չեն եղել»:
Հետևեք մեզ նաև Telegram-ում