Ռուբլով գործ անող գործարարներն արդեն «տակ են տվել». ՌԴ-ի հետ արտահանումների մասով հույսեր չպետք է կապել. Գագիկ Մակարյան
Նմանատիպ
Գործատուների հանրապետական միության նախագահ Գագիկ Մակարյանի դիտարկմամբ դրամի արժեզրկումը և դրան հակառակ՝ դոլարի արժևորումը ձեռնտու է ներմուծողներին կամ նրանք այդ առիթից շատ լավ օգուտներ են քաղում. պատճառաբանում են, թե ավելի թանկ են բերել ապրանքը, ուստի ստիպված են գները բարձրացնել և ավտոմատ կերպով թանկացնում ապրանքը: Ըստ Մակարյանի՝ առաջիկայում էական թանկացումներ են լինելու, ինչը հանգեցնելու է գնողունակության անկման: Այս համատեսքտում տնտեսագետը հիշեցրեց, որ Հայաստանի տնտեսության վրա ազդում և շարունակելու է ազդել ՌԴ-ի հանդեպ արևմտյան պատժամիջոցները, այնպես որ այդ երկիր արտահանումների հետ կապված մեծ հույսեր չպետք է կապել: Ավելին, ռուբլով գործ անող հայրենի գործարարներն արդեն «տակ են տվել», իսկ դոլարով գործունեության համար ՌԴ-ում խնդիրներ են ստեղծվում:
Նման իրավիճակում Գագիկ Մակարյանն առաջարկում է ԿԲ-ին վերանայել իր քաղաքականությունը, որն այդքան էլ արդյունավետ չէ: Այն է՝ 1. դասակարգել ռիսկերը, 2. գնահատել դրանք ըստ ուժգնության աստիճանի, 3. կառավարել դրանք, 4 կանխարգելել: Այս ֆոնին Գործատուների հանրապետական միության նախագահ Գագիկ Մակարյանն անդրադառնալով ԵՏՄ-ին անդամակցմանը, հորդորեց իշխանություններին նախքան առաջ գնալը շտկել մեր «անփույթ» և միամիտ տեսքը՝ շեշտելով, որ ԵՏՄ շրջանակում Բելառուսն ու Ղազախստանը ՀՀ-ի համար դեռևս հավասարակշռող դերակատարում չունեն, միակ պարտնյորը մնում է դեռ Ռուսաստանը. «Այսինքն՝ երազել, թե արագ և ակտիվ տնտեսական ակտիվություն կլինի այս երկրների հետ՝ դա ուտոպիա է»:
Գագիկ Մակարյանը վերադառնալով արժութային թեմային, զգուշացրեց նաև ՌԴ-ին սպառնացող գործազրկության մասին. ընկերությունների ֆինանսապես թուլանալը բերելու է աշխատատեղերի կրճատման կամ աշխատավարձերի իջեցման. «Չեմ կարծում, որ նրանք կարողանան նույն ռեժիմով աշխատավարձերը վճարել: Դա առաջին հերթին կազդի օտարերկրյա աշխատողների վրա»:
Հանդիպմանը ներկա «Այլընտրանք» հետազոտական կենտրոնի ղեկավար Թաթուլ Մանասերյանը չհամաձայնեց Գագիկ Մակարյանի հետ և ԿԲ-ի գործունեության, և Հայաստանին սպառնացող տնտեսական վտանգի աստիճանի հետ կապված:
«Հայաստանը կոլապսի չի ենթարկվի, որովհետև իրավիճակից դուրս գալու շատ ելքեր կան: Չեմ կարծում, որ ՌԴ-ում տիրող իրավիճակն անպայման պետք է իր ուղղակի ազդեցությունն ունենա Հայաստանի վրա: Ճիշտ հակառակը՝ ՀՀ-ն պետք է փորձի օգտվել այն իրավիճակից, որն այսօր կա ՌԴ-ում, դա վերաբերում է և թույլ ռուբլուն, դրա օգուտները մենք հասկանում ենք, և այն որմնախորշերին, որոնք նախկինում զբաղեցված են եղել այլ երկրների կողմից: Հայաստանը պետք է դասեր քաղի մեզ համար համադրելի պետության իրավիճակից: Եվ հետո՝ ԵՏՄ-ն միայն ՌԴ-ն չէ, կա Ղազախստան: Այսօր ԵՏՄ հիմնադիր երկրները գիտական ներուժի կարիք ունեն, ինչը ՀՀ-ն ունի, բայց մեզ մոտ պահանջարկ չկա: Այս հարցը պետք է կարգավորել՝ կանխելով ուղեղների արտահոսքը, այսինքն՝ համատեղ ձեռնարկություններ պիտի ստեղծվեն: Ինչ վերաբերում է ԿԲ-ի աշխատանքին, չեմ կիսում այն կարծիքը, որ ԿԲ -ի գործելակերպն անարդյունավետ է, այն այսօր շատ ավելի ճկուն է, քան նախորդ տարիներին, իհարկե, անելիքներ կան»,-մանրամասնեց տնտեսագետը՝ հորդորելով չգերագնահատել դոլարի կուրսի փոփոխության դերը և համաձայնելով Գագիկ Մակարյանի այն առաջարկի հետ, թե ԿԲ-ն պետք է դասակարգի և կառավարի ռիսկերը:
Հետևեք մեզ նաև Telegram-ում