Տիգրան Կարապետյանը հավատում է Ծառուկյանին և վստահեցնում, որ Եռյակում էլ իրենց կարիքն են զգում
Նմանատիպ
Ժողովրդական կուսակցության առաջնորդ Տիգրան Կարապետյանը հավատում է ԲՀԿ առաջնորդ Գագիկ Ծառուկյանին, որովհետև նա փորձում է հասնել ինչ-որ բանի, որի համար երկար ժամանակ պայքարում է:
«Ես չեմ հավատում, որ Ծառուկյանը դա անում է հենց այնպես՝ անում է իր անձի, իր անվան համար: Բոլորս էլ այդպես ենք մոտենում հարցին: Եթե չհավատայի, չէի միանա եռյակին»,- շեշտեց նա՝ հավելելով, թե չնայած Եռյակի դանդաղկոտությանը, միավորմանը չհավատալուն այլընտրանք չկա, իսկ դանդաղ գործունեությունն էլ ժողովրդի պասիվությամբ և պահանջատիրության բացակայությամբ է պայմանավորված:
Իսկ, թե ինչու վերջին հանրահավաքին հարթակ չբարձրացավ, ԺԿ ղեկավարը նկատեց, թե տեղին չէր լինի ելույթ ունենալը, երբ մյուս ուժերի լիդերները ներկա չէին. «Առաջնորդները չէին եկել, հատուկ երթ էր նախատեսված: Այն հանրահավաքը չէր, որ պարունակում էր ելույթներ: Հարթակի փոխարեն ես ժողովրդի մոտ էի, նրանց հետ կանգնած էի»:
Կարապետյանն իրեն կարոտողներին խոստացավ, որ շուտով ելույթ է ունենալու, այն էլ Ազատության հրապարակում:
Times.am-ի հարցին, թե որն է Ժողովրդական կուսակցության դերը Եռյակում կամ որքանով այդտեղ կա իրենց կարիքը, երբ Եռյակի հիմնադիր ուժերից «Ժառանգությունն» անգամ շատ դեպքերում ազդեցիկ կամ թելադրող դերակատարում չունի, իսկ ԺԿ-ն համարվում է մարդ-կուսակցություն, Տիգրան Կարապետյանը վիրավորվեց, վրդովվեց՝ հարցը համարելով սադրիչ.«Դուք վիրավորում եք իմ կուսակիցներին, մենք շտաբեր ունենք, քաղխորհրդի նիստեր ենք անում, իսկ դուք ասում եք մարդ-կուսակցություն: Ինչ վերաբերում է Եռյակում մեր կարիքը զգալուն, եթե չզգային, ապա ձեռք չէին մեկնի»:
Մեկ այլ լրագրողի հակադարձմանը, թե վերջին գնաճի ֆոնին որքանով էր տեղին Գագիկ Ծառուկյանի կողմից շքեղ հյուրանոցի բացումը, ԺԿ առաջնորդն արձագանքեց. «Չե՞ք ուզում, որ այս երկրում հարուստ մարդիկ լինեն: Հարուստ մարդ ա՝ հյուրանոց ա բացել, ինչ կա որ»:
Հետևեք մեզ նաև Telegram-ում