Էրդողանի մտերիմ Շիրինօղլուն դարձյալ հայկական պահանջատիրությանը դեմ «խաղաղարար» հայտարարություն է արել
Նմանատիպ
Ստամբուլի Սուրբ Փրկիչ հիվանդանոցի նախագահ, հայտնի գործարար, Թուրքիայի նախագահ Ռեջեփ Թայիփ Էրդողանի մտերիմներից հայազգի Պետրոս Շիրինօղլուն հայտարարել է, թե դեմ է, որ 1915-ի թեման այսչափ երկարացվի:
Թուրքական «Սթար» լրատվական կայքը գրում է, որ մինչ հայկական սփյուռքը ցեղասպանության 100-ամյա տարելիցին ընդառաջ բազմաթիվ միջոցառումներ, ցույցեր է կազմակերպում, օտար երկրների խորհրդարաններում հայկական բանաձևեր ընդունել տալիս, Թուրքիայի հայտնի հայերից մեկը պատմական ուղերձների է հղում ՝ ասելով, որ այդ հարցն արդեն պետք է փակել:
«Իմ պապն էլ է մահացել այդ դեպքերի ժամանակ: Մարդկանց խաբելով, եղբորը եղբոր դեմ հանեցին: Ես ներում եմ, փոխհատուցում էլ չեմ ուզում, միայն խաղաղություն եմ ցանկանում»,– ասել է Շիրինօղլուն՝ նշելով, որ Հայաստանի և Թուրքիայի սահմանի բացումն ավելի մեծ տնտեսական եկամուտ կբերի, քան պահանջվող փոխհատուցումը:
«Կա՞ արդյոք խաղաղությունից ավելի մեծ ձեռքբերում: Երկու երկրների սահմանները պետք է բացվեն, պետք է խաղաղություն լինի»,– ընդգծել է Շիրինօղլուն:
Նա նաև նշել է, որ իշխող «Արդարություն և զարգացում» (ԱԶԿ-AKP) կուսակցության իշխանության շրջանում է հայ համայնքն ուշադրության արժանացել, հետ ստացել ազգային փոքրամասնություններին առնչվող իր իրավունքները:
Շիրինօղլուի նեկայացմամբ` ինքն Էրդողանի հետ քննարկել է նաև Թուրքիայում ապօրինի գտնվող հայերի վիճակը: Դրա շնորհիվ հիմա Գումգափըում դպրոց կա, որտեղ սովորում է մոտ 200 հայաստանցի երեխա:
Աղբյուր` Ermenihaber.am
Հետևեք մեզ նաև Telegram-ում