ՄԽ-ի համանագահող երկրներն Արցախի անկախության ճանաչման դեմ են աշխատում. Կիրո Մանոյան
Նմանատիպ
Այս օրերին որոշ փորձագիտական շրջանակներից տեսակետներ եղան, թե Հայոց ցեղասպանության ակտիվ ճանաչումները և միջազգային կառույցների բանաձևերը նվազեցրեցին Թուրքիայի հնարավորությունները միջամտել ԼՂ հարցին՝ հօգուտ Ադրբեջանի: Օրերս, մասնավորապես, նման կարծիք հայտնել էր թուրքագետ Հակոբ Չաքրյանը:
Times.am-ի հետ զրույցում ՀՅԴ Բյուրոյի Հայ դատի և քաղաքական հարցերի գրասենյակի ղեկավար Կիրո Մանոյանը հակառակ կարծիքը հայտնեց.
«ԼՂ հակամարտության կարգավորման գործընթացին Թուրքիայի միջամտելու հնարավորությունը չի նվազել, իհարկե, այդ ուղղությամբ կա ճնշում, բայց կարծում եմ՝ եթե այս օրերին ինչ-որ չափով նվազել է, ապա ընդհանուր առմամբ՝ ոչ: Դեռ չենք լսել այն տեսակետը, թե հայ-թուրքական հարաբերությունները պետք է կարգավորվեն անկախ ԼՂ հարցից: Ավելին՝ չենք տեսել Արևմուտքից (ԱՄՆ, ԵՄ) մոտեցում, թե նախ պետք է հայ-թուրքական հարաբերությունները կարգավորվեն, որից հետո ԼՂ խնդիրը: Ասում են՝ Ղարաբաղի հարցը լուծվի, հայ-թուրքականն էլ կլինի, այս դեպքում ինչներիս են պետք հայ-թուրքական արձանագրությունները, դրանցից պետք է ամբողջությամբ ձերբազատվել»:
Ինչ վերաբերում է Արցախի անկախության միջազգային ճանաչման գործընթացին, Կիրո Մանոյանը շեշտեց, որ այն շատ բարդ և դժվար խնդիր է.
«Մինսկի խմբի համանագահող երկրները դեմ են աշխատում դրան, ոչ թե պարզապես դեմ դիրքորոշում ունեն: Աշխատում են, որ հանկարծ չլինի մեկը, որ ճանաչի: Ինչ վերաբերում է հայկական կողմի անելիքներին այս ուղղությամբ, իհարկե, ամեն չէ, որ արված է՝ կան բաներ, որ պիտի արված լինեին, կան բաներ, որ սրանից հետո կարելի է անել: Մենք այլընտրանք չունենք»:
Հետևեք մեզ նաև Telegram-ում