Կրեմլից Թուրքիային հորդորում են Պուտինի ելույթն ուշադիր կարդալ և հասկանալ ՌԴ-ին ու ՀՀ-ին կապող փաստերը
Նմանատիպ
ՌԴ նախագահ Վլադիմիր Պուտինի մասնակցությունը Հայոց ցեղասպանության 100-րդ տարելիցի միջոցառումներին պատճառ չէ Թուրքիայի կողմից բացասական արձագանքի համար: Կրեմլի կարծիքն է փոխանցել ՌԴ նախագահի մամուլի խոսնակ Դմիտրի Պեսկովը, փոխանցում է ՏԱՍՍ գործակալությունը։
«Մենք չենք կարծում, որ նախագահի մասնակցությունը հիշատակի միջոցառումներին կարող է ինչ-որ կերպ բացասաբար մեկնաբանվել Անկարայի կողմից»,- ասել է Պեսկովը՝ մեկնաբանելով Թուրքիայի արտաքին գործերի նախարարության հայտարարությունը, որտեղ ռուս առաջնորդին, ով 1915թ. դեպքերը գնահատել է որպես ցեղասպանություն, խորհուրդ են տալիս իմանալ՝ «ինչ է ցեղասպանությունը և ինչպիսին են նրա իրավական սահմանները»:
Պեսկովը շեշտել է, որ Հայաստանը շատ կարևոր գործընկեր է Ռուսաստանի համար, Եվրասիական տնտեսական միությանը մասնակից, Ռուսաստանի տարածքում ապրում են մեծ թվով հայեր, առհասարակ, Մոսկվան և Երևանը կապված են խորը պատմական արմատներով։
«Բնական է, որ նախագահն այլ պետությունների առաջնորդների հետ ներկա է եղել Երևանում հիշատակի միջոցառումներին: Շատ կարևոր է ուշադիր ծանոթանալ Պուտինի ելույթին»,– ասել է Կրեմլի ներկայացուցիչը։
Միաժամանակ Պեսկովը կարևոր է համարել, որ Թուրքիան ՌԴ-ի ռազմավարական գործընկերն է. «Մենք կարծում ենք, որ մեր հարաբերությունների զարգացման հեռանկարները բավականին լայն են։ Մենք շատ ենք գնահատում մեր փոխհարաբերությունները Թուրքիայի հետ»: