Հայաստանը կմասնակցի Բաքվում կայանալիք միջազգային քիմիական օլիմպիադային, եթե անվտանգության երաշխիքներ տրվեն
Նմանատիպ
Հայաստանը կմասնակցի Բաքվում կայանալիք Միջազգային քիմիական օլիմպիադային, եթե պատվիրակության համար անվտանգության երաշխիքներ տրվեն:
Այս մասին մայիսի 4-ին լրագրողների հետ զրույցում հայտարարեց ՀՀ կրթության և գիտության նախարար Արմեն Աշոտյանը: Նախարարը նշեց, որ օլիմպիադան տեղի է ունենալու այս տարվա հուլիսին:
«Ստանալով միջազգային կազմկոմիտեի առաջարկությունը՝ մենք նախնական դրական պատասխան ենք տվել: Մեր հավաքականը պատրաստ է մասնակցել Բաքվում կայանալիք միջազգային քիմիական օլիմպիադային, եթե հետագայում ստանանք պատվիրակության համար անվտանգության երաշխիքներ: Ամենայն հավանականությամբ, եթե գնանք, մեր պատվիրակությունը կուղեկցեմ ես»,- «Արմենպրես»-ի փոխանցմամբ՝ նշեց Արմեն Աշոտյանը:
Նախարարի խոսքով՝ ինքը և՛ բացման, և՛ փակման արարողություններին կլինի երեխաների հետ: «Նորից կրկնեմ՝ մենք ուզում ենք մասնակցել, որովհետև իրադարձությունը միջազգային է, մեր աշակերտներին զրկել այս հնարավորությունից մենք չենք ցանկանում և չենք կարող, բայց նաև պետք է ստանանք անվտանգության երաշխիքներ և փորձենք մեդալներով վերադառնալ»,-հավելեց Աշոտյանը:
Տասնհինգ երկրների 92 աշակերտ Հայաստանում այս օրերին մասնակցում են մեկ այլ՝ «Քիմիա» առարկայի դպրոցականների Մենդելեևյան միջազգային 49-րդ օլիմպիադային: Իրադարձությունն անցկացվում է մայիսի 3-10-ը Երևանի Ա. Շահինյանի անվան ֆիզիկամաթեմատիկական հատուկ դպրոցում:
Հետևեք մեզ նաև Telegram-ում