Հայ սեյսմոլոգները նոր սարքով կինտեգրվեն միջազգային սեյսմիկ գիտացանցում
Նմանատիպ
Հայաստանը «Գառնիի երկրաֆիզիկայի դիտարան» պետական հիմնարկում տեղադրված սարքի շահագործմամբ կմասնակցի երկրաշարժերի ու դրանց նախորդող երևույթների դիտարկմանը: Այս մասին հայտնեց ՀՀ տարածքային կառավարման և արտակարգ իրավիճակների նախարարի առաջին տեղակալ Վաչե Տերտերյանը:
«Սեյսմիկ պաշտպանություն ազգային ծրագրի շրջանակներում Հայաստանի Հանրապետությունում ու Լեռնային Ղարաբաղում գործում է 150 սեյսմիկ դիտակայան, և ծախսերը հիմնականում ուղղվել են այդ դիտակայանների պահպանմանն ու շահագործմանը: Գառնիի գիտական հետազոտությունների հիմնարկում տեղադրել ենք մի հատուկ սարք, ինչը հնարավորություն կտա ինտեգրվել միջազգային սեյսմիկ գիտացանցում, ունենալ հզոր կենտրոն, և մասնակցել դիտարկումների երկրաշարժերի ու դրանց նախարդող երևույթների ժամանակ: Այս տարի այդ կենտրոնը շահագործման կհանձնենք»,-«Արմենպրես»-ի փոխանցմամբ` հայտնեց Վաչե Տերտերյանը:Դիտակայանները ժամանակակից տեխնիկական սարքերով վերազինման խնդիր ունեն, սակայն ընթացիկ տարում այդ կայանների հատկացումները ուղղված են պահպանման ու շահագործման ծախսերին:
«Այս տարի բյուջետային նման ռեսուրս նախատեսված չէ, մենք պետք է շարունակենք պահպանման ու շահագործման ծախսերը, բայց միջազգային համագործակցության շրջանակներում որոշակի պայմանավորվածություններ ունենք, որ այդ դիտակայանների մի զգալի մասում բարեփոխումներ իրականացվեն»,-նշեց փոխնախարարը:
Անդրադառնալով Հիդրոօդերևութաբանական ծառայություններին` Վաչե Տերտերյանը տեղեկացրեց, որ աշխատանքը կատարվում է 47 հիդրոօդերևութաբանական և 7 հիդրոլոգիական կայանների միջոցով:
«Ծառայությունը ինտեգրված է միջազգային ու հատկապես տարածաշրջանային ցանցերում: Այստեղ էլ հիմնական ծախսերն ուղղված են եղել պահպանմանն ու շահագործմանը: Որևէ առաջընթացի կամ վերազինման ծախսեր չեն ներառվել 2015-ի բյուջեում»,-նշեց պաշտոնյան:
Հետևեք մեզ նաև Telegram-ում