Վիրահայոց թեմի ու Վրաստանի հոգեւոր առաջնորդները քննարկել են Վիրահայ համայնքին հուզող հարցեր
Նմանատիպ
Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը Թբիլիսիի պատրիարքարանում հանդիպել է Վրաց ուղղափառ եկեղեցու հովվապետ Իլիա Երկրորդին եւ քննարկել վիրահայոց համայնքին և հայոց եկեղեցուն հուզող հիմնահարցերը: Ինչպես փոխանցեցին Հայ առաքելական եկեղեցու Վիրահայոց թեմի մամուլի դիվանից, սրբազան հայրը նորին սրբությանն է փոխանցել Ամենայն Հայոց Գարեգին Բ Կաթողիկոսի ցավակցական նամակը հունիսի 14-ին Թբիլիսիում տեղի ունեցած ջրհեղեղի հետևանքների և մարդկային զոհերի առնչությամբ և հաղորդել հայոց Վեհափառի բարեմաղթանքները վրաց հովվապետին ու համայն Վրաստանին:
Վիրահայոց թեմի առաջնորդը համայն Վրաստանի Պատրիարքի հետ քննարկել է նաև վիրահայոց համայնքին և Հայոց եկեղեցուն հուզող հիմնահարցերը: Երկուստեք պատրաստակամություն են հայտնել հայ և վրաց եկեղեցիներին հուզող հարցերի վերաբերյալ ունենալ հաճախակի հանդիպումներ, քրիստոնեական սիրո և փոխադարձ հասկացության մթնոլորտում միասին քննարկել առաջացած խնդիրները, զերծ մնալ քայլերից, որոնք կարող են վնաս հասցնել հայ-վրացական եկեղեցական հազարամյակների եղբայրությանը: Վրաց եկեղեցու պատրիարքն իր բարեմաղթանքներն է հղել Ամենայն Հայոց Կաթողիկոս Գարեգին Երկր որդին և ասել, որ հակառակ բոլոր դժվարությունների, վրաց ուղղափառ եկեղեցին միշտ կմնա հայ առաքելական եկեղեցու կողքին:
Հետևեք մեզ նաև Telegram-ում