«Հայկական Ժամանակ». Հոսանքի թանկացման դեմ մարզերում անցկացվող ցույցերը, կարծես թե մարում են

Էլեկտրաէներգիայի սակագնի բարձրացման դեմ ցույցերը մարզերում կարծես թե մարում են: Գյումրիում, օրինակ շաբաթ օրը ավարտվել է շուրջօրյա նստացույցը, և ցույցի մասնակիցները այս օրերին Գյումրու թատերական հրապարակում հանրային քննարկումներ են անցկացնում՝ հասկանալու համար իրենց հետագա գործողությունները:

Գյումրեցի ակտիվիստ Տարոն Գրիգորյանը «Հայկական Ժամանակ»-ի հետ զրույցում ասել է, որ Բաղրամյան պողոտայում ցուցարարների՝ մի քանի խմբերի բաժանված լինելուց հետո իրենց հետագա անելիքները հստակեցված չեն:

«Երբ խառը վիճակ ստեղծվեց, մենք որոշեցինք, որ պետք է սպասենք ու տեսնենք՝ ինչ փոփոխություններ կլինեն Երևանում: Ամեն դեպքում՝ ամեն օր, ժամը վեցին մենք հավաքվում ենք Գյումրու թատերական հրապարակում և հանրային քննարկումներ ենք կազմակերպում»,-ասել է ակտիվիստը: