«Լյուբավան» ՀՀ-ի գործընկերն է և Ադրբեջանի հետ չի համագործակցի. Ի՞նչ խոշոր պատվեր է տվել ՀՀ ՊՆ-ն «Լյուբավա-Արմենիա»-ին (ֆոտո, տեսանյութ)
Նմանատիպ
ՀՀ պաշտպանության նախարարությունը «Լյուբավա-Արմենիա» հայ-լեհական ձեռնարկությանը քողարկիչ ծածկոցներ է պատվիրել՝ հակառակորդի ջերմատեսիլ, օպտիկական և ռադարային սարքերի համար անտեսանելի դարձնելու մարդուն, զինտեխնիկան և վրանները: Ծածկոցները 2 և 3 D ծածկույթով են:
Ներկայացվածն ապահովում է արդյունավետ տեսողական քողարկում 25 մ-ից, իսկ գիշերային տեսողական սարքերից՝ 20 մ-ից:
«Մենք տիրապետում ենք աշխարհում ամենաժամանակակից տեխնոլոգիաներից մեկին: Այսօր մարտադաշտում օգտագործվում են տարբեր սարքեր՝ ջերմադիտարկուն և այլն, իսկ այս քողարկիչ ծածկերն օգնում են անտեսանելի մնալ: Սա ՀՀ պաշտպանության նախարարության երկրորդ խոշոր պատվերն է, առաջինը ձեռնարկության բացվելուց անմիջապես հետո էր: Լեհական արտադրության նման քողարկիչ ծածկոցներ մենք մատակարարում ենք նաև ՆԱՏՕ-ի անդամ երկրների բանակներին»,-ասում է ձեռնարկության գործադիր տնօրեն Յարոսլավ Ռուխը և շարունակում ներկայացնել ձեռնարկության ռազմական նշանակության արտադրանքը:
Հետախույզի ձմեռային քողարկման հանդերձանք
Անտեսանելի է դարձնում մարդուն ձյան վրա անգամ ջերմատեսիլ սարքերից, ապահովում է նաև հակառադարային հասանելի պաշտպանություն: Արդյունավետ տեսողական քողարկում 25 մ-ից, գիշերային տեսողական համակարգից՝ 20 մ-ից: Հանդերձանքն ունի 2 և 3 D տարբերակներ:
Պակաս կարևոր չէ նաև հետախույզի ուսապարկը՝ նախատեսված երկար տակտիկական գործողությունների ժամանակ սարքավորումներ կրելու համար, որը լեհ հետախույզները պետք է փակ աչքերով կարողանան դասավորել:
Ձեռնարկությունում արտադրվում են նաև պաշտպանողական տարբեր կարողությունների զրահաբաճկոններ: Մասնավորապես՝ պաշտպանիչ զրահապատ բաճկոն, որը նախատեսված է զինված համազգեստավորման կազմավորումների և MOLLE/PALS համակարգ պարագաները և պարկը կցելու համար: Բաճկոնին հնարավոր է կցել նաև լրացուցիչ էլեմենտներ՝ վիզը, ուսը, փորը պաշպանելու համար: Կամ՝ PRO պաշտպան զրահաբաճկոն, որը ևս նախատեսված է զինված կազմավորումների, ինչպես նաև MOLLE/PALS մոդուլային համակարգ ֆունկցիոնալ պարկեր և մարտավարական սարքավորումները կրելու համար: Փափուկ և ճկուն բալիստիկ ներդիրները K2 կարգի առավելագույն պաշտպանություն են ապահովում: Մեկ այլ՝ կրծքավանդակի պաշտպան CHR-3, որը նախատեսված է 2 բալիստիկ թիթեղ կրելու համար, օգտագործված նյութերի շնորհիվ ապահովում է երկար ողջ մնալու հավանականություն նույնիսկ ծայրահեղ պայմաններում:
Այստեղ «Լյուբավա-Արմենիա» հայ-լեհական ձեռնարկության գործադիր տնօրենը չի մոռանում կերամիկական ներդիրով զրահաբաճկոնների մասին, որոնք պաշտպանում են ՍՎԴ-ից և Կալաշնիկովից արձակված գնդակներից, ընդ որում՝ վերջինից մարմինի նույն հատվածում 6 խոցման դեպքում:
Ռազմական նշանակության արտադրանքի շարքում առանձնահատուկ դեր ունեն նաև կեղծ թիրախները. րոպեների ընթացքում կառուցվող տանկը կարող է խուճապ առաջացնել հակառակորդի մոտ և մոլորեցնել նրան՝ սխալ պատկերացում տալով տեղակայված ուժերի թվաքանակի վերաբերյալ:
«Լյուբավա-Արմենիա»-ի պատվիրատուներից է նաև ՀՀ տարածքային կառավարման և արտակարգ իրավիճակների նախարարությունը. արտադրվում են մեկ րոպեում բացվող փրկարարական վրաններ, որոնք կարող են ծառայել որպես դաշտային հոսպիտալ: Հիմքի կառուցվածքը օդաճնշական շրջանակի վրա է:
«ԱԻՆ-ից պատվերներ ունեն և հարևան Վրաստանից, ավելին՝ խոշոր գործարք է նախապատրաստվում մեկ այլ երկրի հետ»,-տեղեկացնում է ՀՀ ՊՆ ռազմաարդյունաբերական վարչության պետ Մուրադ Իսախանյանը` հավելելով, որ պատվերների ավելացմանը զուգահեռ յուրաքանչյուր տարի ձեռնարկության աշխատողների թիվը 25-ով ավելացվում է. «Յուրաքանչյուր արտադրամասի ծանրաբեռնումից հետո սկսում են նման կարգի այլ արտադրամաս բացել: Այս պահին աշխատանքներ են տարվում և հաջորդ մեր արտադրամասը կլինի զրահապատ թիթեղների արտադրության: Վստահ ենք, որ մինչև տարեվերջ այս արտադրամասը 70 տոկոս ծանրաբեռնվածություն կունենա: Հենց մեկ ուրիշը ծանրաբեռնեցինք, լեհական կողմը կանցնի մի նոր արտադրամասի կառուցմանն ըստ պայմանագրի: Սահմանափակում չկա»:
Մեկ կարևոր սկզբունք, որ պահպանում է «Լյուբավան», այն է՝ լինելով ՀՀ-ի գործընկերը, չի համագործակցում Ադրբեջանի հետ և մեր հակառակորդն իրեն անհրաժեշտ արտադրանք ձեռք է բերում լեհական այլ ընկերություններից:
«Լյուբավա-Արմենիա»-ի ստեղծման պատմությունը
«Լյուբավա-Արմենիա»-ն («Lubawa Armenia») ստեղծվել է 2013-ի մարտի 27-ին լեհական Lubawa ընկերության և «Չարենցավանի հաստոցաշինական գործարան» ԲԲԸ-ի միջև կնքված պայմանագրով: «Լյուբավա-Արմենիա»-ի բաժնետոմսերի 51 տոկոսը պատկանում է լեհական կողմին, 49 տոկոսը՝ հայկական: 2013-ի ապրիլի 30-ին հայ-լեհական ընկերության հիմնադիրներից «Lubawa» ընկերությունը ներկայացրել է իր արտադրանքը Հայաստանի զինված ուժերի ներկայացուցիչներին: Արտադրանքի մեջ եղել են քողարկման ցանցեր, վրաններ և պաշտպանության միջոցներ: Իսկ արդեն 2013-ի դեկտեմբերին հայ-լեհական ընկերությունն իր առաջին պայմանագիրն է կնքել ՀՀ պաշտպանության նախարարության հետ, որի համաձայն՝ ընկերությունը պարտավորվել էր Հայաստանի զինված ուժերին տրամադրել քողարկման ցանցերի 80 համալիր՝ յուրաքանչյուրում 6×3քմ մակերեսով 12 ցանցեր: Պայմանագիրն արժեցել է շուրջ 1 մլն ամերիկյան դոլար:
2014 թվականի հուլիսին ՀՀ կառավարությունը հաստատեց պաշտպանության նախարար Սեյրան Օհանյանի՝ կառավարության որոշման նախագիծը, որի համաձայն Հայաստանը՝ շուրջ 406,65 մլն դրամի ներդրում է անելու հայ-լեհական «Լյուբավա-Արմենիա» ռազմարդյունաբերական ընկերությունում՝ ակնկալելով լեհական կողմի համապատասխանաբար շուրջ 10 մլն ամերիկյան դոլարի ներդրումներ:
Որոշման համաձայն՝ ՀՀ ՊՆ-ն՝ որպես «Չարենցավանի հաստոցաշինական գործարան» բաց բաժնետիրական ընկերության 80 տոկոս բաժնեմասի կառավարիչ, գործարանի 406,65 մլն դրամի գույք (վարչական, արտադրական մասնաշենքեր և հարակից հողատարածքներ) անհատույց փոխանցելու է Հայաստանի Հանրապետության կառավարությանը։ Գույքը կապիտալի տեսքով ներդրվելու է հայ-լեհական «Լյուբավա Արմենիա» ռազմարդյունաբերական ընկերությունում, որի հաշվին կիրականացվեն արտադրությունը նախապատրաստելու և կազմակերպելու միջոցառումներ:
Հայկական կողմի ներդրման դիմաց լեհական կողմը պայմանագրով ստանձնում է տեխնոլոգիական սարքավորումների ձեռքբերման, տեխնոլոգիայի ձեռքբերման, կադրերի պատրաստման, արտադրության կազմակերպման և շինարարական աշխատանքների կազմակերպման պարտավորություն՝ կատարելով մոտ 8 մլն.-ի ներդրում:
2013-ի օգոստոսից մինչ օրս լեհական կողմը շինարարական աշխատանքների, մասնավորապես՝ նոր մասնաշենքի կառուցման համար արդեն ներդրել է մոտ 2 մլն ամերիկյան դոլար:
«Լյուբավա-Արմենիա» հայ-լեհական ձեռնարկության պաշտոնական բացումը տեղի է ունեցել 2014-ի հոկտեմբերի 16-ին:
Հավելենք, որ «Լյուբավա» ընկերությունը գործում է 1951 թվականից: 1996թ. վերածվել է բաց բաժնետիրական ընկերության: Այլ ընկերությունների հետ միավորվելու արդյունքում կազմավորվել է «Լյուբավա» արդյունաբերական խումբը: Ներկայումս այդ կառույցի մեջ մտնում են չորս ընկերություններ, որոնք զբաղվում են ինչպես ռազմական, այնպես ել քաղաքացիական արտադրանքի թողարկումով:
Այդ չորս ընկերություններն են՝
-«Լյուբավա ՍԱ» (վրաններ, հատուկ և մասնագիտացված հագուստ, զրահաբաճկոններ, սաղավարտներ և այլն)
-«Միրանդա» (տեքստիլ արտադրանք, քողարկող ցանցեր և հագուստ, վրաններ)
-«Լիտեքս Պրոմո» (արտաքին գովազդային պարագաներ, սպորտային պարագաներ և այլն)
-«Էֆեկտ Սիստեմ» (բարձրորակ ժամանակակից տպագրություն տարբեր մակերեսների, այդ թվում՝ նաև տեքստիլի վրա):
«Լյուբավա» արդյունաբերական խումբն ունի ՆԱՏՕ-ի և եվրոպական երկրների որակի բոլոր անհրաժեշտ հավաստագրերը:
Մարիամ ՊԵՏՐՈՍՅԱՆ
Հետևեք մեզ նաև Telegram-ում