«Սփյուռք» ամառային դպրոցի մասնակիցներն այցելեցին ՀՀ նախագահի նստավայր
Նմանատիպ
ՀՀ սփյուռքի նախարարության «Սփյուռք» ամառային դպրոցի մասնակիցներն այցելել են ՀՀ նախագահ Սերժ Սարգսյանի նստավայր: Ինչպես տեղեկացրին ՀՀ սփյուռքի նախարարության լրատվական ծառայությունից, ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչության պետ Մերի Հարությունյանը ծրագրի մասնակիցներին է ներկայացրել ՀՀ Նախագահի և նախագահական ինստիտուտի գործունեությունը, ՀՀ Սահմանադրությամբ Նախագահի գործառույթները, պետական իշխանության համակարգում նրա տեղն ու դերը, պետության ղեկավարի փոխհարաբերությունները պետական իշխանության մյուս մարմինների հետ:
Այնուհետև ներկաները դիտել են ՀՀ Նախագահի և նախագահական ինստիտուտի գործունեության մասին պատմող տեսաֆիլմ, որից հետո վարչության աշխատակից Գայանե Սարգսյանի ուղեկցությամբ շրջայց կատարել դահլիճներում:
Շրջայցի ընթացքում «Սփյուռք» ամառային դպրոցի մասնակիցները հետաքրքիր տեղեկություններ են ստացել Նախագահի նստավայրի մասին՝ երբ է այն կառուցվել, ով է եղել ճարտարապետը, ինչպիսին է շենքի կառուցվածքը, շրջայցի ծրագրում ներառված դահլիճներում և սրահներում ըստ արարողակարգի ինչ միջոցառումներ են անցկացվում և այլն:
Այցի ավարտին մասնակիցները՝ որպես նվեր, ստացել են շրջայցի լուսանկարներով և հայկական դրոշի գույներով կրիչներ:
Հետևեք մեզ նաև Telegram-ում