Սոթքում հողային լիցքի եւ հարթեցման են ենթարկվում գյուղամիջյան բոլոր ճանապարհները
Նմանատիպ
Գեղարքունիքի մարզի Սոթք գյուղում տեղական բյուջեի միջոցների հաշվին հողային լիցքով հարթեցվում ու նորոգվում են գյուղամիջյան ճանապարհները` բոլոր 23 փողոցներով հանդերձ: Ինչպես «Արմենպրես»-ին տեղեկացրեց Սոթքի գյուղապետ Կոլիկ Շահսուվարյանը, տեղական բյուջեից տրամադրված 12 միլիոն դրամի հաշվին հողային լիցքով հարթեցվում են գյուղի 23 փողոցներ, որոնց մեծ մասը տարիների ընթացքում չէին նորոգվել, որոշ տեղերու մ էլ առաջացած փոսերի հետեւանքով անանցանելի վիճակ էր առաջացել:
Մոտ 18 կիլոմետր ընդհանուր երկարություն ունեցող փողոցներում հիմնանորոգումն ընթանում է երկու ամիս, իսկ աշխատանքները կավարտվեն այս ամսվա ընթացքում: «Հիմնանորոգում ու բարեկարգում ենք թե’ կենտրոնական, թե’ երկրորդական նշանակության փողոցները: Կենտրոնական փողոցների հողային լիցքը պատում ենք Վարդենիս-Մարտակերտ ավտոճանապարհի ասֆալտի հին շերտի թափոններով, որով ավելի ամուր ու ապահով է դառնում նորոգ ճանապարհը: Իհարկե, թանկ հաճույք է ասֆալտապատումը, սակայն կփորձենք հետագա տարիների ընթացքում գոյացած միջոցները փուլ առ փուլ տրամադրել գյուղի հիմնական փողոցների ասֆալտապատմանը»,-նշեց համայնքի ղեկավարը:
Խոսրով Խլղաթյան
Հետևեք մեզ նաև Telegram-ում