Հայաստանի և Շվեյցարիայի ԱԳՆ-ները հերթական քաղաքական խորհրդակցությունները կանցկացնեն 2016-ի սկզբին
Նմանատիպ
Երևանում անցկաված Ֆրանկոֆոնիայի միջազգային կազմակերպության արտգործնախարարների համաժողովի 31-րդ նստաշրջանի շրջանակներում Հայաստանի Հանրապետության արտաքին գործերի փոխնախարար Կարեն Նազարյանը հանդիպել է Շվեյցարիայի դաշնային դեպարտամենտի պետքարտուղարի տեղակալ Ժորժ Մարտենի հետ: Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, փոխնախարար Նազարյանը շնորհակալություն է հայտնել Մարտենին` Ֆրանկոֆոնիայի նախարարական համաժողովին մասնակցելու կապակցությամբ` ընդգծելով, որ այն լավ հնարավորություն է ընձեռնել նաև երկկողմ հարաբերությունների օրակարգը քննարկելու համար:
Անդրադարձ է կատարվել երկու երկրների միջև քաղաքական երկխոսության հետագա զարգացմանը, ինչպես նաև միջազգային կազմակերպություններում և միջխորհրդարանական վեհաժողովներում համագործակցության կարևորությանը: Քննարկվել են երկկողմ իրավական դաշտի ընդլայնման հնարավորությունները:
Հանդիպմանը կողմերն անդրադարձել են տարածաշրջանում տեղի ունեցող զարգացումներին, մասնավորապես՝ սիրիական ճգնաժամի հետևանքով առաջացած փախստականների ճգնաժամին:
Փոխնախարար Նազարյանը ներկայացրել է հայկական կողմի մոտեցումները Լեռնային Ղարաբաղի հետ շփման գծում և հայ-ադրբեջանական սահմանային գոտում Բաքվի կողմից իրավիճակի միտումնավոր սրմանն ուղղված քայլերի կապակցությամբ:
Հաշվի առնելով երկկողմ հարաբերությունների խորությունը՝ կողմերը պայմանավորվել են գալիք տարվա սկզբին հերթական քաղաքական խորհրդակցություններն անցկացնել ԱԳՆ-ների միջև:
Հետևեք մեզ նաև Telegram-ում