Ջերմոցի կառուցման և շահագործման մասին նոր ձեռնարկ է ներկայացվել

«Ջերմոցային տնտեսություններ. կառուցման, շահագործման և մշակության հիմունքներ» ձեռնարկն առաջին անգամ ներկայացվել է նոյեմբերի 27-ին: Ձեռնարկը ստեղծվել է Հայաստանի ՓՄՁ ԶԱԿ-ի կողմից, ԱՄՆ ՄԶԳ ֆինանսավորմամբ իրականացվող «Գործընկերություն՝ հանուն գյուղական համայնքների բարգավաճման» ծրագրի շրջանակում։ Այն մշակել է «Բի Էս Սի» բիզնեսի աջակցման կենտրոնը:

Ինչպես տեղեկացրին Հայաստանի ՓՄՁ ԶԱԿ-ից, ձեռնարկը պարունակում է տեղեկատվություն ջերմոցների կառուցման, շահագործման և մշակության վերաբերյալ` տեխնիկական, տեխնոլոգիական և տնտեսական ուղղություններով: Ձեռնարկը սկսնակ ֆերմերներին և գյուղատնտեսական ոլորտի գործարարներին հնարավորություն կտա պատկերացում կազմել ջերմոցային տնտեսությունների հիմնադրման և շահագործման համար անհրաժեշտ պայմանների, քայլերի և միջոցների վերաբերյալ:

Այն հայերենով ներկայացվող առաջին ձեռնարկն է, որում ընթերցողին է ներկայացվում ամբողջական տեղեկատվություն և կիրառական գիտելիքներ ջերմոցային տնտեսությունների կառուցման, շահագործման և տարբեր բույսերի մշակության վերաբերյալ: Ձեռնարկն օգտագործողներն իրենց ներդրումը կունենան գյուղատնտեսության ոլորտում նոր աշխատատեղերի և հավելյալ եկամուտների աղբյուրների ստեղծման գործում: Այն նախատեսված է ինչպես ջերմոցային տնտեսությունների ոլորտում փորձառուների, այնպես էլ սկսնակների համար: Ձեռնարկը կարող է օգտակար լինել ուսանողների, դասախոսների և բոլոր նրանց համար, ովքեր հետաքրքրված են ջերմոցային տնտեսությունների հիմնադրմամբ:

Առաջին բաժինն անդրադառնում է ջերմոցային տնտեսությունների տեխնիկական բնութագրերին և հիմնադրման անհրաժեշտ քայլերին: Ներկայացված են ջերմոցների ձևերն ու տեսակները` ելնելով տարբեր հատկանիշներից` տեղանքի ընտրությունը և ջերմոցի ճիշտ տեղակայումը, ջերմոցների կառուցվածքի առանձնահատկությունները և կառուցման համար անհրաժեշտ նյութերը: Երկրորդ բաժինը նվիրված է ջերմոցների կառուցվածքին և հարակից համակարգերին: Քննարկվում են ջերմոցների կմախքի կառուցման և պոլիէթիլենային ծածկի ամրացման գործընթացները, ինչպես նաև ներկայացվում են և արդյունավետության տեսանկյունից նկարագրվում օդափոխության, ջեռուցման, լուսավորության, ոռոգման և հենակապային համակարգերը: Երրորդ բաժինը նվիրված է ջերմոցային պայմաններում բանջարային մշակաբույսերի աճեցմանը և խնամքին:

Գրքի էլեկտրոնային տարբերակը հասանելի է «Բի Էս Սի» բիզնեսի աջակցման կենտրոնի և Հայաստանի ՓՄՁ ԶԱԿ-ի կայքերում:

2013 թ. օգոստոսից Հայաստանում մեկնարկել է ԱՄՆ Միջազգային զարգացման գործակալության «Գործընկերություն` հանուն գյուղական համայնքների բարգավաճման» (USAID PRP) հնգամյա ծրագիրը: Հայաստանի ՓՄՁ զարգացման ազգային կենտրոնի գլխավորությամբ ծրագիրն իրականցնում են համայնքային զարգացման մեծ փորձ ունեցող «Ագ րոբիզնեսի և գյուղի զարգացման կենտրոնը» (CARD), Գեղարքունիքի առևտրաարդյունաբերական պալատը և գործարար խորհրդատվություն իրականացնող «Ի-Վի Քոնսալթինգ» կազմակերպությունը: