Հենց իրենց աղբյուրներից մի նոր զոհ ենք գտել. Արծրուն Հովհաննիսյանը՝ Ադրբեջանի կորուստերի մասին
Նմանատիպ
Ադրբեջանը հիմա, քան երբևէ, արգելափակել է իր տեղեկատվական հոսքերը, հետևաբար՝ դժվար է իմանալ, թե վերջին ռազմական գործողությունների հետևանքով որքան զոհ է ունեցել ադրբեջանական կողմը: Այդ մասին այսօր լրագրողների հետ հանդիպմանը հայտարարեց ՀՀ Պաշտպանության նախարարի մամուլի խոսնակ Արծրուն Հովհաննիսյանը:
Նա փոխանցեց՝ հենց երեկ ադրբեջանական աղբյուրներից մի նոր զոհ են գտել:
«Այսքան վերահսկողության տակ, որ մենք շաբաթը մեկ մեկ-երկուսին գտնում ենք իրենց մոտ՝ սոցցանցերում, պատահական նկարներում, ինչ-որ քոմենթներում ենք էդ անունը գտնում, հետո փորձում գնալ դրա հետևից: Բավականին բարդ աշխատանք է կատարվում: Հստակ թիվ ասելը շատ դժվար է: Ի վերջո, նրանց զորքերն էլ են բերված մարտական բարձր աստիճանի և տեղակայված համապատասխան վայրերում ու առօրյա շփումներից, որ ունեին իրենց ընտանիքների հետ, այժմ զրկված են, հետևաբար այդ թվերը ստանալը հնարավոր չէ», -ասաց Հովհաննիսյանը` պատասխանելով հարցին, թե որքա՞ն են կազմում հակառակորդի կորուստները, քանի որ նախկինում խոսվում էր հազարավոր զոհերի մասին:
Հովհաննիսյանն այն կարծիքին է, որ պատերազմական իրավիճակի մեղմացումից և խաղաղության հաստատումից հետո ադրբեջանական կորուստների թիվը չի զարմացնի և մոտ կլինի հայկական կողմի կանխատեսումներին. «Պաշտպանության բանակը հայտնեց երկու հազար զոհի մասին, միգուցե դրանք բոլորն անմիջապես ռազմաճակատում զոհվածները չեն, բայց դրանցում շատ մեծ է ծանր վիրավորների թիվը, հատկապես՝ հրետանային կրակից: Մենք ասում էինք, որ մեր հրետանին շատ փայլուն գործողություն է կատարել»:
Հետևեք մեզ նաև Telegram-ում