Դեբեդ գետի վրայով «Բարեկամության կամրջի» կառուցման հայտամրցույթ է հայտարարվել
Նմանատիպ
Սադախլո-Բագրատաշեն հսկիչ անցակետում Դեբեդ գետի վրայով կամրջի նախագծման եւ շինարարության հայտամրցույթ է հայտարարվել: Այդ մասին, ինչպես տեղեկացնում Է «Արմենպրես»-ը, հայտարարել Է «Նովոստի Գրուզիա»-ն՝ հղում անելով Վրաստանի տարածաշրջանների զարգացման նախարարության ավտոմոբիլային ճանապարհների դեպարտամենտին:
Հայտամրցույթը կշարունակվի մինչեւ սեպտեմբերի 20-ը Վերակառուցման եւ զարգացման եվրոպական բանկի Էլեկտրոնային գնումների համակարգում: Պայմանագրորդ ընկերությունն ընտրելու առաջին փուլում դիտարկվելու են միայն հավակնորդների տեխնիկական առաջարկները, երկրորդ փուլում՝ ճշտված եւ նորացված տեխնիկական առաջարկները, ինչպես նաեւ առեւտրային հայտերը:
Ենթադրվում Է, որ պարտավորագրի իրացումը կսկսվի այս տարվա դեկտեմբերի 28-ին եւ կշարունակվի երեքուկես տարի, այդ թվում՝ 18 ամիս կտրամադրվի նախագծմանն ու շինարարությանը եւ 24 ամիս՝ բացահայտված թերությունների վերացմանը:
Նախագիծը ֆինանսավորելու Է ՎԶԵԲ-ը, իսկ վարկը վճարելու են Հայաստանը եւ Վրաստանը՝ հավասար բաժիններով:
Հայ-վրացական սահմանի հատման վայրում Դեբեդ գետի վրայով նոր կամրջի կառուցման վերաբերյալ համաձայնագիրը երկու երկրների կառավարությունների միջեւ ստորագրվել Է 2014 թվականի դեկտեմբերին:
Հայաստանի եւ Վրաստանի կառավարությունների ղեկավարների կողմից ստորագրված արձանագրության համաձայն՝ հայ-վրացական սահմանի նոր կամուրջը կստանա «Բարեկամության կամուրջ» անվանումը:
Հետևեք մեզ նաև Telegram-ում