AM | RU | EN
USD
EUR
RUB

Հիմնական թիրախներից մեկը ՀԱՊԿ միասնության հարցն է

Ի՞նչ ակնկալիքներ կարող է ունենալ Հայաստանը ՀԱՊԿ երեւանյան գագաթաժողովից, հավաքական անվտանգության անդամ երկրների ղեկավարների այս հավաքը որեւէ բանով կտարբերվի՞ նախորդներից։ Այս հարցերի մասին է մեր հարցազրույցը քաղաքագետ ՀՐԱՆՏ ՄԵԼԻՔ-ՇԱՀՆԱԶԱՐՅԱՆԻ հետ։

-Այս գագաթաժողովը կարեւոր է, որովհետեւ Հայաստանը, որպես ՀԱՊԿ-ում նախագահող երկիր, այս ընթացքում փորձել է կառույցի առաջնահերթությունները համապատասխանեցնել այն խնդիրներին, որոնք ծառացած են մեր երկրի առջեւ։ Եվ հիմա, երբ Հայաստանի ներկայացուցիչը նշանակվելու է ՀԱՊԿ գլխավոր քարտուղար, պարզ է, որ մեր երկիրը շարունակելու է ակտիվ դերակատարություն ունենալ այդ կառույցի արտաքին քաղաքական եւ ռազմաքաղաքական գերակայությունների մշակման գործընթացում։ Այդ առումով, իսկապես կարեւոր է, որ կարողանանք լիարժեք իրացնել այդ հնարավորությունը եւ փորձենք գտնել լուծումներ, որոնք շահեկան կլինեն թե՛ կառույցի հետագա զարգացման, թե՛ մեր ազգային անվտանգության ապահովման տեսակետից։

Մյուս կողմից՝ սա աշխարհաքաղաքական առումով կարեւոր միջոցառում է, որն անցկացվում է Երեւանում. այստեղ հավաքվելու են ՀԱՊԿ երկրների ղեկավարները, ինչը ինքնին արդեն աշխարհաքաղաքական մեծ խաղացողների ուշադրությունը սեւեռելու է Հայաստանի վրա։

Մենք տեսնում ենք ապակայունացնող լուրջ ազդակներ ոչ միայն Հարավային Կովկասում, այլեւ հարակից տարածաշրջաններում, եւ գերտերությունները, ուժային կենտրոնները ուշի-ուշով հետեւում են, թե ինչ քաղաքական հայտարարություններ կհնչեն ՀԱՊԿ գագաթաժողովի շրջանակներում, այդ կառույցն ինչ լուծումներ կառաջարկի, ինչպես կարձագանքի տարածաշրջանում առկա մարտահրավերներին։

-Վերլուծաբանների մի մասը Նազարբաեւի այցի չեղարկումը կապում է գագաթաժողովում ընդունվելիք ամփոփիչ հայտարարության հետ. իբր՝ հայտարարության տեքստում Բաքվի համար տհաճ ձեւակերպումներ են լինելու ապրիլյան պատերազմի կապակցությամբ, եւ Նազարբաեւը չի ուզում նեղացնել Ալիեւին՝ ստորագրելով այդ փաստաթուղթը։

-Նազարբաեւի դիրքորոշումը Ղարաբաղյան հակամարտության վերաբերյալ հայտնի է։ Պարզ է, որ նա թրքամետ գործիչ է, եւ այդ հակամարտության մեջ ավելի մտահոգված է Ադրբեջանի, քան ՀԱՊԿ անդամ դաշնակից երկրի՝ Հայաստանի շահերով։

Այդ տեսակետից, շատ էլ կարեւոր չէ, թե ինչ պատճառով չի մասնակցում գագաթաժողովին. փաստն այն է, որ չի մասնակցում, եւ անկախ դրա իրական կամ ցուցադրական պատճառներից, չմասնակցելով՝ լուրջ հարված է հասցնում ՀԱՊԿ-ի հեղինակությանը եւ ամրապնդմանը որպես տարածաշրջանային ռազմաքաղաքական գործոն։

-Այս օրերին մամուլում առավել հաճախ արծարծվող հարցերից մեկը հետեւյալն է. եթե երեւանյան գագաթաժողովում ընդունվելիք հայտարարության մեջ չափից ավելի կոշտ ձեւակերպումներ լինեն Մերձավոր Արեւելքում ՆԱՏՕ-ի երկրների, ընդհանրապես Արեւմուտքի «ոչ միանշանակ» դերակատարության վերաբերյալ, Հայաստանը չի՞ հայտնվի Արեմուտք-Ռուսաստան օրըստօրե սրվող հակասությունների կիզակետում։

-Նախ, եկեք ֆիքսենք, որ Հայաստանն ինքը շահեր ունի Սիրիայում, եւ այդ շահերին հետամուտ է լինելու՝ սիրիահայ մեր հայրենակիցների խնդիրները լուծելու համար պարտավոր է համագործակցել ե՛ւ Ռուսաստանի, ե՛ւ ՆԱՏՕ-ի, ե՛ւ ցանկացած այլ երկրի հետ։

Ինչ վերաբերում է Արեւմուտք-Ռուսաստան հակասությունների թիրախ դառնալու սպառնալիքին, վստահ եմ, թե՛ Արեւմուտքը, թե՛ Ռուսաստանը ըմբռնումով են վերաբերվում Հայաստանի, չասեմ՝ չեզոքություն պահպանելու, բայց այդ հարցերում երկուսի հետ էլ համագործակցելու ցանկությանը։ Բոլորը հասկանում են՝ նախ, Հայաստանը մեծ պոտենցիալ չունի վճռական դերակատարում ունենալու, օրինակ, նույն սիրիական հակամարտության կարգավորման հարցում։

Երկրորդ՝ Հայաստանը ունի իր խնդիրները տարածաշրջանում, եւ այդ խնդիրներին հետամուտ լինելու համար ուղղակի «դատապարտված» է համագործակցելու թե՛ Ռուսաստանի, թե՛ Միացյալ Նահանգների հետ, եւ համագործակցում է՝ մեկի հետ մի քիչ ավելի շատ, մյուսի հետ՝ ավելի քիչ։ Եվ առ այսօր ե՛ւ պաշտոնական Վաշինգտոնը, ե՛ւ Մոսկվան, ե՛ւ Թեհրանը, ե՛ւ ուժային մյուս կենտրոնները ընկալել եւ ընդունել են մեր դիրքորոշումը։

-Շատերին է հետաքրքրում՝ ո՞վ է ստանձնելու ՀԱՊԿ գլխավոր քարտուղարի պաշտոնը։ Այդ համատեքստում շրջանառվում է, մասնավորապես, Վաղարշակ Հարությունյանի անունը։ Ի՞նչ գիտեք այդ մասին։

-Ընդհանրապես ռազմաքաղաքական նշանակումները գաղտնի են պահվում։ Բացի դրանից, նման քննարկումները սովորաբար երկար են տեւում, եւ կարող է մինչեւ վերջին պահը հստակեցված չլինի՝ ում առաջադրել, կամ որ երկիրն ում է տեսնում այդ պաշտոնում։ Ի վերջո, այստեղ հավաքվում են անդամ երկրների ղեկավարները, եւ դա պիտի լինի նրանց համատեղ որոշումը՝ տեղեկատվությունը ժամանակից շուտ հրապարակելու դեպքում դա կարող էր ընկալվել որպես պարտադրված թեկնածություն։

Ինչ վերաբերում է Վ.Հարությունյանին, կարծում եմ, նա կարող է ղեկավարել ցանկացած հեղինակավոր կազմակերպություն. նրա փորձը, գիտելիքները եւ անցած ճանապարհը տալիս են այդ հնարավորությունը։ Չեմ ուզում գուշակություններ անել՝ շատ բան կախված է նրանից, թե ինչ ռազմաքաղաքական խնդիրներ կդրվեն ՀԱՊԿ-ի առջեւ գագաթաժողովի արդյունքում։ Քաղաքական տեսանկյունից Վ.Հարությունյանը լավ թեկնածու է, բայց Հայաստանում կան էլի թեկնածուներ, եւ իրականում այստեղ ընտրության հնարավորություն կա։

Հեղինակ՝ Լիլիթ Պողոսյան

Հարցազրույցն` «Հայոց Աշխարհ» օրաթերթի Հոկտեմբերի 14-ի համարից

Լրահոս
Ֆիյոնի կնոջը հարցաքննելու են կեղծիքով աշխատանքի տեղավորվելու գործով. Le Parisien Ասկերանի բերդում վերականգնողական աշխատանքներ են ընթանում Քարաթափման հետևանքով Կապան-Քաջարան ավտոճանապարհը միակողմանի փակ է ՀՀ-ԱՄՆ հարաբերությունների զարգացման մեջ դեսպան Միլսը կարևորում է կրթական ծրագրերի դերը Գլադիատորական մարտերում՝ մաքսիմուսյան լուծումներ. Արշակ Արշակյան Բարսեղ Թումանյանը համերգային ծրագրով հանդես կգա օպերային բեմում ՉԺՀ դեսպանը հյուրընկալվել է ՀՀԿ կենտորնական շտաբում ՀՀ տարածքում կան դժվարանցանելի ավտոճանապարհներ Ֆրանսահայ բժիշկը Ստեփանակերտում իրականացնում է անվճար վիրահատություններ Ամերիկացի ներդրողներն ավելի ու ավելի շատ են հետաքրքրվում Հայաստանի ներդրումային հնարավորություններով. Միլս Արտասահմանում գտնվող ՀՀ քաղացիների համար նախատեսվել է էլեկտրոնային եղանակով հաշվառում Արցախի Նախագահն ընդունել է ԵԱՀԿ Մինսկի խմբի համանախագահներին ՀՀ Նախագահը Արարատի մարզում ներկա է գտնվել Վեդու ջրամբարի հիմնարկեքի արարողությանը ԱՄՆ կառավարությունը ողջունում է խաղաղապահ առաքելություններում Հայաստանի ներդրումը Լապշինի հարցով Հայաստանը տարբեր մակարդակներով դիմել է Բելառուսին. ՀՀ ԱԳՆ Քարոզարշավի շրջանակներում Հայաստանի կոմունիստական կուսակցության ներկայացուցիչները Գյումրիում էին ՀՅԴ-ն և «Ելք» դաշինքը ներկայացնում են կոալիցիա կազմելու հավանական տարբերակները Հայտարարում ենք, որ ՕՐՕ դաշինքի այս պնդումներն էլ չեն համապատասխանում իրականությանը Հայաստանում Ֆրանսիայի դեսպանն ու մշակույթի նախարարը քննարկել են ֆրանկոֆոնիայի գագաթնաժողովի անցկացումը Վինձորի դղյակում ուժեղացվել են անվտանգության միջոցները Նախագահ Սերժ Սարգսյանը այցելել է Արարատի մարզ Հակառակորդի կրակոցից զինծառայող է զոհվել Ձկան եւ ձկնամթերքի վերաբերյալ ԵԱՏՄ տեխնիկական կանոնակարգն ուժի մեջ կմտնի 2017-ի սեպտեմբերի 1-ից Ըստ գտնվելու վայրի քվեարկությանը մասնակցելու տեղեկանք է ստացել 28 հազար քաղաքացի Դոլարը, եվրոն, ֆունտն ու ռուբլին արժեզրկվել են Հայաստանի ժողովուրդն ու կառավարությունը բարձր են գնահատում ԱՄՆ-ի հետ բարեկամական գործընկերությունը. ՀՀ ԱԳ նախարար Հայաստանի եւ Ղրղզստանի տնտեսական արդյունքները խոսում են երկրների ճիշտ ընտրության մասին. Վալովայա Հայտնի է 2017 թվականի ընթացքում ավիափոխադրումների համար ամենամատչելի օրը Եթե չլիներ ԵԱՏՄ-ն, մեր երկրների տնտեսական ցուցանիշները շատ ավելի վատ կլինեին. Տատյանա Վալովայա ՀՀ ԱԻՆ և ԱՄՆ համագործակցության շնորհիվ վերազինվում են մարզային հրշեջ-փրկարարական ջոկատները Հայաստանը բարձր է գնահատում ԼՂ խնդրի կարգավորման գործում ԱՄՆ կարևոր դերը. Նալբանդյան Տերյան և Իսահակյան փողոցների խաչմերուկում կտեղադրվի լուսացուցային օբյեկտ Վահան Շիրխանյանի առողջական վիճակը պարզելու նպատակով նշանակվել է դատաբժշկական փորձաքննություն «Օհանյան-Րաֆֆի-Օսկանյան» դաշինքն առաջարկում է վերացնել 12-ամյա կրթական համակարգը Հայաստանի ընտրությունների հանդեպ աննախադեպ միջազգային հետաքրքրություն կա. Արմեն Աշոտյան «Ծառուկյան» դաշինքն ամփոփեց նախընտրական քարոզարշավը Դիարբեքիրի ութ գյուղերում փողոց դուրս գալու արգելք է հայտարարվել Վարդենյաց լեռնանցքը բացվել է Ֆրանսիացիների երրորդ մասը վստահ է, որ Մակրոնը հաջողություն կունենա նախագահի պաշտոնում Բելառուսում ՀՀ դեսպանը հրաժեշտի հանդիպում է ունեցել Ալեքսանդր Լուկաշենկոյի հետ
Խմբագրի ընտրություն
website by Sargssyan