Հայաստանը մասնակցել է «Զոդչեստվո» միջազգային փառատոնին
Նմանատիպ
ՌԴ մայրաքաղաք Մոսկվայում հոկտեմբերի 21-ին կայացել է Զոդչեստվո-2016 միջազգային փառատոնի արդյունքների ամփոփումն ու մրցանակների շնորհման արարողությունը: Այս մասին տեղեկացրին ՀՀ ԿԱ քաղաքաշինության պետական կոմիտեից:
Հեղինակավոր այս փառատոնին Հայաստանից ներկայացվել էին մի շարք ճարտարապետական նախագծեր:
«Զոդչեստվո» ամենամյա ճարտարապետական և քաղաքաշինական միջազգային փառատոնի «Տարվա լավագույն արտասահմանյան կառույց» անվանակարգում հաղթող է ճանաչվել Նարեկ Սարգսյանի հեղինակած կառավարության նոր համալիրի նախագիծը:
Փառատոնի միջոցառումներին մոսկովյան կողմի հրավերով մասնակցում էր նաև ՀՀ ԿԱ քաղաքաշինության պետական կոմիտեի Ալ. Թամանյանի անվան ճարտարապետության ազգային թանգարան-ինստիտուտի տնօրեն Անուշ Տեր-Մինասյանը:
Մրցանակների հանձնման արարողությանը մասնակցում էին ՌԴ Ճարտարապետների միության նախկին և ներկա նախագահները՝ Անդրեյ Բոկովը և Նիկոլայ Շումակովը, բնագավառի բազմաթիվ հայտնի դեմքեր: Անուշ Տեր-Մինասյանի փոխանցմամբ փառատոնի կազմակերպիչները կարողացել էին իսկական ճարտարապետական տոն ստեղծել:
Նա այն կարծիքին է, որ մեր ճարտարապետները պետք է կարողանան մշտական մասնակցություն և ներկայություն ունենալ ոլորտի հեղինակավոր փառատոներին և մրցույթներին՝ վերականգնելով նախկինում եղած կապերն ու հարաբերությունները, ստեղծելով և ձևավորելով նորերը:
Հետևեք մեզ նաև Telegram-ում