Մոսկվան եւ Անկարան Հալեպում զինադադարի համաձայնության երաշխավորներ են դարձել. The Guardian

Ռուսաստանը եւ Թուրքիան հանդես են գալիս Արեւելյան Հալեպից խաղաղ բնակիչների եւ ընդդիմության զինյալների դուրսբերման համաձայնագրի կատարման երաշխավորներ: Ինչպես տեղեկացնում է «Արմենպրես»-ը, այս մասին դեկտեմբերի 13-ին հայտնել է The Guardian-ը: Տեղեկատվությունը հրատարակությանը հավաստել են Թուրքիայի կառավարության եւ սիրիական ընդդիմության ղեկավարության աղբյուրներ:

The Guardian-ի տվյալներով՝ համաձայնությունն արդեն մտել է ուժի մեջ:

Ավելի վաղ Սիրիայի զինվորական հրամանատարությունում հաստատել են Հալեպում հրադադարի շուրջը համաձայնության ձեռքբերումը: «Ալ Ջազիրա» միջարաբական հեռուստաալիքը հայտնել է, որ համաձայնագրի պայմանները ենթադրում են «խաղաղ քաղաքացիների եւ թեթեւ զենքով զինյալների դուրսբերում Հալեպի արեւելյան շրջաններից»: Համաձայնագրի ստորագրումը նաեւ հավաստել է «Ահրար աշ Շամ» ազդեցիկ խմբավորումը, որը պայքար է մղում Սիրիայի կառավարական բանակի դեմ, հաղորդել է «Ինտերֆաքս»-ը: