Ադրբեջանում քաղբանտարկյալները հացադուլ են հայտարարել
Նմանատիպ
Ադրբեջանում «Մուսուլմանական միասնություն» շարժման ձերբակալված նախագահ Թալեհ Բագըրովը, ընդդիմադիր Ժողովրդական ճակատ կուսակցության նախագահի տեղակալ Ֆուադ Գահրամանլըն եւ նրանց հետ միասին 16 այլ անձինք դեկտեմբերի 19-ին հացադուլ են հայտարարել:
Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:
Ադրբեջանի Ազատություն ռադիոկայանի փաստաբան Յալչըն Իմանովի հաղորդմամբ` Նարդարանի գործով ձերբակալվածները ակցիան սկսել են ի նշան բողոքի, քանի որ բանտարկյալներին չի թույլատրվում մասնակցել իրենց գործերով ընթացող դատական լսումներին:
Թալեհ Բագըրովի խոսքերով, իրենց ամեն անգամ բերում են Բաքվի ծանր հանցագործությունների դատարան, սակայն պահում են նկուղում եւ թույ չեն տալիս մասնակցել դատերին:
Ի նշան բողոքի, դատապարտյալների փաստաբանները նույնպես հրաժարվել են մասնակցել դատավարություններին:
2015 թվականի նոյեմբերի 27-ի կեսօրին նամազի ժամանակ իրավապահները ներխուժել էին Նարդարանի շիական «Իմամ Հուսեին» մզկիթ, հայհոյանքներ տեղացել այնտեղ գտնվողների հասցեին, բռնություններ գործադրելով ձերբակալել Ադրբեջանի շիաների առաջնորդ Թալե Բաղըրզադեին և ևս 14 հավատացյալների: Ոստիկանների գործողությունները զայրացրել էին Նարդարանի բնակիչներին: Նրանց և ոստիկանության միջև բախումներ էին սկսվել: Փոխհրաձգությունների հետևանքով երկու ոստիկան և 5 բնակիչ սպանվել էին: Հաջորդ օրերին իսլամիստների և ոստիկանության միջև բախումներ էին սկսվել նաև Գյանջայում, Լենքորանում և այլ քաղաքներում:
Նարդարանի գործով ձերբակալված բոլոր անձինք դատապարտվել են 1 տարի 6 ամսից մինչեւ 6 տարի 6 ամիս ազատազրկումների:
Ադրբեջանի ՆԳՆ-ն և գլխավոր դատախազությունը միջադեպի առնչությամբ հայտարարություն էր տարածել, որում ասվում էր, որ ավանի շիա առաջնորդները ծրագում են բռնությամբ փոխել սահմանադրական կարգը և երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում ու երկրի շրջաններում և մատակարարել նրանց զենքով և պայթուցիկ նյութերով: «Բացի այդ խումբը Նարդարան ավանում անօրինական հավաք է անցկացրել` քննարկելով իշխանությանն անհնազանդության ակցիայի կազմակերպում և թռուցիկներ բաժանել բնակչությանը և որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում», -նշվել էր հայտարարության մեջ:
«Մուսուլմանական միություն» շարժման առաջնորդ Թալեհ Բագըրովի եւ այլ 17 անձանց դատավարությունները դեռեւս շարունակվում են: Ամբաստանյալները հերքում են իրենց նկատմամբ առաջադրված մեղադրանքները, սակայն դատարանը չի ընդունում, բացի այդ ամբաստանյալներին խոշտանգումների միջոցով ստիպում են ցուցմունքներ տալ:
Հետևեք մեզ նաև Telegram-ում