«Հայկական ժամանակ». Պաշտոնանկությունից առաջ Գագիկ Խաչատրյանը շքեղ վերանորոգել էր Ֆիննախի շենքը

ՀՀ ֆինանսների նախկին նախարար Գագիկ Խաչատրյանը իր պաշտոնանկությունից առաջ նախարարության շենքը բավականին շքեղ վերանորոգել էր՝ սկսած փայտե որակյալ մանրահատակից, թանկարժեք դռներից, վարագույրներից, վերջացրած կահույքով։ Այս մասին գրել է «Հայկական ժամանակ»-ը:

«Ընդ որում, այդ շքեղ վերանորոգումը նախատեսվել ու կատարվել էր այն ժամանակ, երբ Հայաստանում մոլեգնում էր տնտեսական ճգնաժամը։ Ֆիննախից ի պատասխան մեր այդ հարցմանն՝ ասել էին, որ վերանորոգման վրա ծախսվել է 698 մլն դրամ կամ մոտ 1,5 մլն դոլար։ Ֆիննախից նաև մեզ փոխանցեցին, որ նախարարությունը զբաղեցնում է մոտ 5 հազար 600 քմ տարածք։

Այսինքն, այդքան տարածք է վերանորոգվել։ Եթե այս գումարը բաժանենք այդ մակերեսի վրա, ապա կստացվի, որ 1 քմ վերանորոգման համար ծախսվել է 124 հազար դրամ կամ 256 դոլար։ Մասնագետների պնդմամբ՝ դա խոշոր գումար է ոչ բնակարանային շինության վերանորոգման համար»,-հավելել է թերթը: