Իրանը Հայաստանի միջոցով կարող է կապվել Սև ծովին և Եվրոպային

Հայաստան ուղևորվելիս Թեհրանի «Մեհրաբադ» օդակայանում լրագրողների հետ հանդիպման ժամանակ նախագահ Հ. Ռուհանին հայտարարել է, որ «Իրանը Հայաստանի միջոցով կարող է կապվել Սև ծովին և Եվրոպային»: Այս մասին իր ֆեյսբուքյան էջում գրել է իրանագետ Վարդան Ոսկանյանը:

Նման բարձրաստիճան մակարդակում Հայաստանը Պարսից ծոց – Սև ծով միջանցքի կարևորագույն օղակ դիտարկելու հանգամանքի փաստումն արդեն իսկ խոսում է իրանական կողմի պատրաստակամության մասին, ոչ միայն օժանդակելու Հայաստանին հաղթահարել ադրբեջանա-թուրքական դաշինքի շրջափակումը, այլև ուղղակի մարտահրավեր նետելու հենց նույն այդ դաշինքին:

Այս առումով նախագահ Հ. Ռուհանիի այցը Հայաստան կարող է շրջադարձային լինել ոչ միայն մեր երկու երկրների միջև սեփական օրակարգն առավել արդյունավետությամբ իրականացնելու առումով, այլ նաև, ֆուտբոլային եզրաբանությամբ, Բաքվին և Անկարային «խաղից դուրս թողնելու» իմաստով՝ հատկապես, որ վերջին շրջանւմ այս երկուսն էլ հասցրել են զգալիորեն փչացնել հարաբերությունները Թեհրանի հետ:

Այս առումով պատահական չէ, որ Բաքվի հիստերիկ արձագանքը բանաձևվել է նաև հետևյալ կերպ՝ «Հայաստանին աջակցող երկիրը մեզ եղբայր չի կարող լինել»: Ինչպես ասում են՝ ձեզ չի կարող, բայց մեզ եղբայր, հո, կարող է լինել:

 

Հետևեք մեզ նաև Telegram-ում