Ռուս սակրավորները գրեթե հազար հեկտար տարածք են ականազերծել Հալեպում

 Միջազգային հակաականային կենտրոնի ռուս զինծառայողները Հալեպի արեւելյան մասում զինյալներից ազատագրված թաղամասերի հումանիտար ականազերծման ընթացքում պայթյունավտանգ իրերից մաքրել են չորս դպրոց, ինը մզկիթ եւ մեկ մանկապարտեզ, տեղեկացնում է «Արմենպրես»-ը՝ հղում անելով ՏԱՍՍ-ին:

Ընդամենը 2016 թվականի դեկտեմբերի 5-ից ականազերծվել է 966 հեկտար ընդհանուր մակերեսով տարածք, հայտնել է Սիրիայի հակամարտող կողմերի հաշտեցման ռուսական կենտրոնը:

«Պայթյունավտանգ առարկաներից մաքրվել են շուրջ 350 կիլոմետր ավտոճանապարհներ եւ 2149 շենքեր, այդ թվում՝ 44 դպրոց, 38 մզկիթ, 10 հիվանդանոց եւ պոլիկլինիկա, երկու մանկապարտեզ, երեք ջրաբաշխիչ կայան, երկու էլեկտրակայան, ջրամաքրման մեկ կայան եւ հացի մեկ գործարան»,- ասված է կենտրոնի հաղորդագրության մեջ: