Դինքն ամբողջությամբ նվիրվում էր աշխարհն ավելի լավը դարձնելու գործին. Մուրադ Բելգե

Դինքն ամբողջությամբ նվիրվում էր աշխարհն ավելի լավը դարձնելու գործին. Մուրադ Բելգե

Հրանտ Դինքն արդար, մարդասեր, քաջ և բարոյական մարդ էր: Նա ամբողջությամբ նվիրվում էր աշխարհն ավելի լավը դարձնելու գործին: Այս մասին «Արմենպրես»-ի հետ զրույցում ասաց հայտնի թուրք մտավորական, ակադեմիկոս, քաղաքացիական ակտիվիստ Մուրադ Բելգեն՝ Դինքի սպանության 10-րդ տարելիցին խոսելով պոլսահայ մտավորականի ապրած կյանքի և թողած ժառանգության մասին:

«Նրա հիմնական յուրահատկությունն այն էր, որ կարողանում էր ներսի բարությունն արտացոլել աշխարհի վրա: Երբ խոսում էր, հնարավոր չէր չնկատել, որ խոսում է համեստ և սիրով լեցուն մի մարդ: Կարծում եմ հենց դրա շնորհիվ էլ նրա հուղարկավորությունը վերածվեց չսպասված մի «իրադարձության»: Հրանտի համար երթի դուրս եկածների շարքում կային մարդիկ, ում սովոր էինք տեսնել քաղաքական բնույթի հավաքների ժամանակ: Սակայն շատ լավ հիշում եմ, որ բացի նրանցից կային նաև վերջիններիցս խիստ տարբերվող, մեկը մյուսին չնմանվող անձինք: Դա ապացույցն էր այն բանի, որ Հրանտն իր ձայնը լսելի էր դարձրել հասարակության շատ տարբեր շրջաններում և ստիպել էր սիրել իր անձը»,– նշեց Բելգեն:

Թուրք մտավորականն ընդգծեց, որ Դինքը մահվանից հետո իր հետքը թողեց Թուրքիայի հասարակության վրա: «Հրանտն արդեն չկա: Դատական գործը շարունակվում է: Կան մարդիկ, ովքեր վճռական են հետևելու դատին մինչև վերջ (և դա շատ իմաստալից է): Նրանք հասարակության հավաքական հիշողության մեջ Հրանտի գոյություն ունենալու «տեսանելի արդյունքն են»: Սակայն հավատացած եմ, որ կան նաև ազդեցություններ, որոնք անտեսանելի են»,– ասաց Բելգեն: Նա նշեց, որ մարդկանց մտածելակերպում գոյություն ունեցող Հրանտը կոչ է անում բոլորին լինել ավելի լավը՝ ասելով. «Մենք կարող ենք լինել ավելի լավը, քան կանք: Դա, իհարկե, ջանք կպահանջի, սակայն այն արժե»:

Արաքս ԿԱՍՅԱՆ

Հետևեք մեզ նաև Telegram-ում