Քաղաքագետի խոսքով՝ Հայաստանում քաղաքական պայքարը ընթանում է մի քանի շերտերով
Նմանատիպ
Հայաստանում քաղաքական ուժերը խորհրդարանական ընտրություններից առաջ երկու բևեռների ձևավորման միտում ունեն: «Արմենպրես»-ի հաղորդմամբ` հունվարի 24-ին լրագրողների հետ հանդիպման ժամանակ նման կարծիք հայտնեց քաղաքագետ Ալեքսանդր Մարգարովը:
«Ներկայումս Հայաստանի քաղաքական դաշտը ձգտում է դեպի «երկբևեռացում»: Մի բևեռը «Հայաստանի Հանրապետական» կուսակցությունն է լինելու որպես իշխանակենտրոն ուժ, մյուսը` նոր ձևավորվող դաշինքը, որի հիմքում «Բարգավաճ Հայաստան» կուսակցությունն է և նրա շուրջ համախմբված քաղաքական միավորները»,- նշեց Մարգարովը: Ըստ նրա` կլինեն ուժեր, որոնց նպատակն է հաղթահարել խորհրդարանում մտնելու նվազագույն շեմը:
«Լինելու են նաև ուժեր, որոնք բազմիցս հնչեցնում են իրենց դիրքորոշումը, սակայն իրական ուժն ավելի քիչ է, քան այն աղմուկը, որն իրենք բարձրացնում են»,- ասաց Մարգարովը:
Քաղաքագետի խոսքով՝ Հայաստանում ոչ առաջին անգամ քաղաքական պայքարը ընթանում է մի քանի շերտերով:
«Միշտ չէ, որ ընտրապայքարն ընթանում է «իշխանություն ընդդեմ ընդդիմություն» ձևաչափով: Եթե վերցնենք ընդդիմադիր դաշտը, ապա տեսնում ենք, որ քաղաքական պայքար է ընթանում ավելի ընդդիմադիր կամ ընդդիմության առաջնորդ դառնալու համար: Այս պայքարն ի վերջո թուլացնում է ընդդիմության դաշտը»,- ընդգծեց քաղաքագետը:
Հայաստանում Ազգային ժողովի հերթական ընտրությունները տեղի կունենան 2017թ. ապրիլի 2-ին: Նախընտրական քարոզարշավը կմեկնարկի մարտի 5-ին: Կուսակցություններն ու կուսակցությունների դաշինքներն Ազգային ժողովի ընտրություններին մասնակցելու հայտերը Կենտրոնական ընտրական հանձնաժողով պետք է ներկայացնեն փետրվարի 6-16-ը, իսկ տարածքային և համամասնական ցուցակները` փետրվարի 16-26-ը:
Հետևեք մեզ նաև Telegram-ում