Էրդողանը խնդիր չի տեսնում արտակարգ դրության պայմաններում հանրաքվեի անցկացման համար
Նմանատիպ
Թուրքիայի նախագահ Ռեջեփ Թայիփ Էրդողանը հայտարարել է, որ որևէ խնդիր չի տեսնում երկրում սահմանադրական փոփոխությունների հանրաքվեի անցկացումն արտակարգ դրության պայմաններում: Ինչպես հաղորդում է «Արմենպրես»-ը, այս մասին հայտնում է թուրքական Diken լրատվամիջոցը:
«Մենք շարունակելու ենք մեր ճանապարհը մինչև արդյունքի հասցնելը: Արտակարգ դրությունը դրա համար շատ ավելի հարմար հող կարող է նախապատրաստել»,- ասել է նա: Էրդողանը մերժել է բոլոր նրանց, ովքեր հայտարարում են, որ Սահմանադրական հանրաքվեն չի կարող անցկացվել, քանի երկրում հայտարարված է արտակարգ դրություն: «Նախքան մեր իշխանության գալը Թուրքիայում արտակարգ դրություն էր: Ընտրություններն անց են կացվել այդ պայմաններում: Արտակարգ դրությունը հանեցինք իշխանության գալուց հետո»,– նշել է նա:
Թուրքիայի մեջլիսը հավանություն է տվել իշխող «Արդարություն և զարգացում» կուսակցության (AKP) կողմից առաջարկված սահմանադրական փոփոխություններին, որոնք բաղկացած են 18 կետից: Սահմանադրական փոփոխություններով երկիրն անցնում է կառավարման նախագահական համակարգի:
Մեջլիսում փոփոխությունների առաջարկի անցկացումը հնարավոր է եղել միայն ընդդիմադիր «Ազգայնական շարժում» կուսակցության աջակցության շնորհիվ:
Խորհրդարանի կողմից հաստատումից հետո փաստաթուղթը պետք է ստորագրի երկրի նախագահ Ռեջեփ Թայիփ Էրդողանը, ինչից հետո այն կդրվի հանրաքվեի:Հանրաքվեն նախատեսվում է իրականացնել ապրիլի առաջին կեսին:
Հետևեք մեզ նաև Telegram-ում