Տասնյակ հազարավոր մարդիկ են կրկին դուրս եկել բողոքելու Ռումինիայի կառավարության դեմ

Ռումինիայում տասնյակ հազարավոր մարդիկ են կրկին դուրս եկել կառավարության դեմ բողոքի ակցիայի, հաղորդում է «Արմենպրես»-ը՝ հղում անելով Reuters-ին: 

Փետրվարի 12-ին երկրի մայրաքաղաք Բուխարեստում՝ կառավարության շենքի առջեւ, հավաքվել էր 50 հազար մարդ: Ժամը 21:00-ին (Երեւանի ժամանակով ժամը 23:00-ին) նրանք միաժամանակ իրենց գլխավերեւում բարձրացրել են կարմիր, դեղին եւ կապույտ գույների թղթեր՝ այդ կերպ ձեւավորելով ռումինական դրոշը:

Երկրի մյուս քաղաքներում, ինչպես նաեւ արտասահմանում բողոքի են դուրս եկել եւս տասնյակ հազարավորներ մարդիկ:

Ավելի վաղ Ռումինիայի կառավարությունը հրաժարվել է այն ուղղումներից, որոնք կարող էին հանգեցնել բանտերից կառավարող կուսակցության՝ կոռուպցիոն գործերով դատապարտված կողմնակիցների ազատ արձակմանը: Սակայն բողոքները չեն դադարում:

Հուզումների այս ալիքն ամենազանգվածայինն է 1989 թվականի դեկտեմբերից ի վեր, երբ տապալվեց կոմկուսակցության իշխանությունը՝ Նիկոլաե Չաուշեսկուի գլխավորությամբ: