Ադրբեջանում բանտարկված Լապշինն առողջական խնդիրներ ունի

Բելառուսից Ադրբեջան արտահանձնված բլոգեր Ալեքսանդր Լապշինը, ով պահվում է Բաքվի մեկուսարանում, առողջության հետ կապված խնդիրներ ունի: Այս մասին հայտնել է նրա կինը` Եկատերինան, ով հեռախոսազրույց է ունեցել ամուսնու հետ:

«Այսօր խոսել եմ Սաշայի հետ: Պահվելու պայմանները, փառք Աստծո, չեն փոխվել` չունի հարևաններ, կա հնարավորություն շնչելու օդ, տանելի ուտելիք: Սակայն երկար ժամանակ անազատության մեջ գտնվելը, ինչպես նաև նրա «գործում» հստակության բացակայությունն անում են իրենց սև գործը. նրա քունը խանգարվել է, սկսել է հաճախակի ցավալ գլուխը, նաև խնդիր կա ուտելիքի հետ կապված` պարբերաբար չի կարողանում նորմալ սնվել: Մի խոսքով, մեր աշխարհում արժե լավ մտածել այն մասին, որ ճանապարհորդությունները դառնում են վտանգավոր զբաղմունք»,- նշել է Լապշինի կինը:

Բելառուսի Գերագույն դատարանը փետրվարի 7-ին մերժել է Ռուսաստանի և Իսրայելի քաղաքացի, բլոգեր Ալեքսանդր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվի Ադրբեջան:

Լապշինը նույն օրը հատուկ չվերթով տեղափոխվել է Մինսկից Բաքու ` պետական անվտանգության ծառայության աշխատակիցների ուղեկցությամբ:

Ադրբեջանում ՌԴ և Իսրայելի քաղաքացի բլոգերին սպառնում է քրեական հետապնդում 281.2 (երկրի դեմ ուղղված հրապարակային կոչեր) և 318 (Ադրբեջանի Հանրապետության պետական սահմանի անօրինական հատում) հոդվածներով: Երկու հոդվածներով Լապշինին սպառնում է մինչև 5 տարվա ազատազրկում: