ԱՄՆ կոնգրեսականների պատվիրակությունը սեպտեմբերին կայցելի Հայաստան
Նմանատիպ
ԱՄՆ կոնգրեսականների պատվիրակությունը սեպտեմբերին կայցելի Հայաստան: «Արմենպրես»-ի հաղորդմամբ` այդ մասին «Ամերիկայի ձայնին» տված հարցազրույցում ասել է ԱՄՆ կոնգրեսի ներկայացուցիչների պալատի անդամ Աննա Էշուն։
«Սեպտեմբերին Հայաստան է նախատեսում այցելել կոնգրեսականների պատվիրակություն, և եթե իմ ընտրատարածքում որևէ կարևոր բան տեղի չունենա, որը կպահանջեր իմ ներկայությունը, հույս ունեմ՝ կայցելեմ Հայաստան այդ շրջանում»,- ասել է նա և հավելել, որ երբ Հայաստան էր մեկնել նախագահական պատվիրակության կազմում՝ Հայոց ցեղասպանության 100-րդ տարելիցին, իրեն բոլորն ընդունում էին գրկաբաց: «Ես ինձ զգում էի ինչպես հարազատ ընտանիքում»,– ընդգծել է նա:
Կոնգրեսականը խոսել է նաև Հայոց ցեղասպանության ճանաչման գործընթացի մասին, նշել, որ դեռ Կոնգրեսում հաջողության չեն հասցրել Հայոց ցեղասպանությունը ճանաչող օրենքը:
«Այդ գործը դեռևս անավարտ է, և ես հանգիստ չեմ ունենա` մինչև մեր երկիրը չճանաչի այդ, որովհետև պատմության առումով մենք գիտենք, որ երբ որևէ բան ճանաչված չէ, նշանակում է՝ այն ուղղակի գոյություն չունի: Իսկ դա անընդունելի է: Կարծում եմ՝ մեր երկիրը բավականին հզոր է, որ դիմակայի, այսպես կոչված, հսկայական ընդդիմությանը, որն իրականում այնքան էլ հսկայական չէ»,- ասել է Էշուն:
Հետևեք մեզ նաև Telegram-ում