Մակրոնի թիմը պատրաստ է բանակցություններ վարել «Հանրապետականների» հետ

Մակրոնի թիմը պատրաստ է բանակցություններ վարել «Հանրապետականների» հետ

Ֆրանսիայի նորընտիր նախագահ Էմանուել Մակրոնի թիմը պատրաստ է բանակցություններ վարել երկրի հիմնական պահպանողական կուսակցության՝ «Հանրապետականների» հետ: Այդ մասին, ինչպես տեղեկացնում Է «Արմենպրես»-ը, հայտնել է Reuters գործակալությունը՝ վկայակոչելով Մակրոնի ներկայացուցիչ Առնո Լերոյին:

«Հանրապետականների մեջ կա մի խումբ, որի անդամներն ասում են. «Մենք ցանկանում ենք օգտակար լինել երկրին, բայց «մակրոնացում» չենք ցանկանում: Լինելով պատասխանատու մարդիկ՝ մենք բաց ենք քննարկումների համար: Ես դռները բաց եմ պահում»,-հայտարարել է Լերոյը՝ ելույթ ունենալով ֆրանսիական BFM TV հեռուստաալիքի եթերում:

Մայիսի 11-ին Էմանուել Մակրոնի կողմից ստեղծված «Հառա՛ջ, հանրապետություն» շարժումը ներկայացրել է հունիսին կայանալիք խորհրդարանական ընտրությունների թեկնածուների առաջին ցուցակը: Դրա մեջ մտել է 428 մարդ՝ հավասար քանակությամբ կանայք ու տղամարդիկ: Թեկնածուների 52 տոկոսի համար քաղաքականությունը նոր զբաղմունք է, եւ նրանք երբեք չեն մասնակցել ընտրություններին:

Գործակալության տվյալներով՝ շարժման կողմից հրապարակված ցուցակում տեղ են գտել «Սոցիալիստական կուսակցության» մի քանի կողմնակիցներ, հաղորդել է ՌԻԱ Նովոստին:

Հետևեք մեզ նաև Telegram-ում