Ֆրանսիայում հրապարակվել է նոր կառավարության կազմը

Ֆրանսիայում հրապարակվել է նոր կառավարության կազմը, որն աշխատելու է երկրի նախագահ Էմանուել Մակրոնի հետ: Ժան Իվ լե Դրիանը, որն ավելի վաղ գլխավորում էր Ֆրանսիայի պաշտպանության նախարարությունը, նշանակվել է հանրապետության արտաքին գործերի նոր նախարար: Այդ մասին, ինչպես տեղեկացնում է «Արմենպրես»-ը, մայիսի 17-ին հայտնել են Ֆրանսիայի կառավարությունում: 

Երկրի պաշտպանության նախարարի պաշտոնը կզբաղեցնի Սիլվի Գուլարը: Փարիզյան ԶԼՄ-ները հիշեցնում են, որ Գուլարն ավելի վաղ հանդես էր գալիս հաջակցություն Ֆրանսիայի նախագահ Էմանուել Մակրոնի «Հառաջ» շարժման, նա եվրապատգամավոր է, ներկայացնում է «Դեմոկրատական շարժում» կուսակցությունը:

Ֆրանսիայի Էկոնոմիկայի նոր նախարար է դարձել «Հանրապետականներ» կուսակցությունից Ազգային ժողովի պատգամավոր Բրյունո լե Մերը: Նա անցյալում եղել է Ֆրանսիայի եվրոպական գործերի պետքարտուղար, գյուղատնտեսության, պարենամթերքի, ձկնորսության գործերի եւ տարածքային պլանավորման նախարար:

Ֆրանսիայի արդարադատության նախարար է հայտարարվել Ֆրանսուա Բայրուն՝ «Դեմոկտրատական շարժում» կենտրոնամետ կուսակցության առաջնորդը:

Ինչպես հայտնել են Ֆրանսիայի կառավարությունում, նախարարների նոր կաբինետն առաջին նիստը կգումարի մայիսի 18-ին:

Մայիսի 15-ին Ֆրանսիայի նախագահ Էմանուել Մակրոնը երկրի վարչապետ Է նշանակել Էդուար Ֆիլիպին եւ հանձնարարել նրան՝ կազմել կառավարություն: 46-ամյա Ֆիլիպը Հավրի քաղաքագլուխն էր, Ազգային ժողովի պատգամավոր՝ «Հանրապետականներ» կուսակցությունից, հաղորդել է «Ինտերֆաքս»-ը: