ՍԱՊԾ-ն և Հայաստանի ազգային ագրարային համալսարանը կհամագործակցեն սննդամթերքի անվտանգության ոլորտում
Նմանատիպ
Սննդամթերքի անվտանգության ոլորտում վերահսկողություն իրականացնող և մասնագիտական կրթություն ապահովող կառույցների միջև փոխգործակցության ուղղություններն այսուհետև ամրագրված կլինեն փաստաթղթով: ՀՀ ԳՆ սննդամթերքի անվտանգության պետական ծառայության (ՍԱՊԾ) և Հայաստանի ազգային ագրարային համալսարանի (ՀԱԱՀ) միջև մայիսի 18-ին ստորագրվել է համագործակցության հուշագիր, որը հնարավորություն կստեղծի մի կողմից, սննդամթերքի անվտանգության ապահովման նպատակով, կիրառել առկա գիտական ներուժը, մյուս կողմից՝ համալսարանի մասնագետներին և ուսանողներին ներգրավել ՍԱՊԾ-ի կողմից իրականացվող աշխատանքներում՝ ամրապնդելով վերջիններիս գործնական գիտելիքները: Համալսարանի ռեկտոր Արշալույս Թարվերդյանը եւ ՍԱՊԾ պետ Իշխան Կարապետյանը, ստորագրելով համատեղ աշխատանքներն էլ ավելի սերտ, կանոնակարգված ու հստակեցված դարձնող հուշագիրը, կարևորել են սննդամթերքի անվտանգության մակարդակի բարելավմանն ուղղված համատեղ ջանքերն ու նոր նախաձեռնությունները: Այս մասին տեղեկացրին ՀՀ ԳՆ ՍԱՊԾ տեղեկատվության և հասարակայնության հետ կապերի բաժնից:
«Այս համագործակցությունը հնարավորություն է տալիս պետական վերահսկողության ոլորտում օգտագործել գիտական ներուժը: Ես ակնկալում եմ համատեղ մի շարք ծրագրեր. հունիսից սկսած՝ ուսանողները կընդգրկվեն իրազեկման մեր նախաձեռնություններում, միաժամանակ՝ անասնաբուժական կրթություն ստացողները ուսումնական պրակտիկա կանցնեն Հատուկ վտանգավոր ախտածինների ռեֆերենս լաբորատորիայում»,- ասել է ՍԱՊԾ պետը:
ՀԱԱՀ ռեկտոր, ՀՀ ԳԱԱ իսկական անդամ Արշալույս Թարվերդյանը ընդգծել է, որ ծրագիրը շատ կարեւոր է հատկապես հետադարձ կապի տեսակետից, քանի որ հնարավորություն է տալիս փորձաքննության ենթարկել ուսումնական պլաններն ու ծրագրերը. – «Այս նախաձեռնության արդյունքում մենք կունենանք տեսական ու գործնական գիտելիքներով, հմտություններով օժտված լավ ուսանողներ, դուք՝ ժամանակակից պահանջներին համապատասխանող մասնագետներ»:
Համագործակցության նոր ձևաչափով՝ Ագրարային համալսարանի դասախոսները և ուսանողներն ավելի լայն մասնակցություն կունենան սննդամթերքի անվտանգության, անասնաբուժության, բուսասանիտարիայի ոլորտներում իրականացվող միջոցառումների մշակմանը, առկա խնդիրների լուծման աշխատանքներին: Մասնավորապես, բացի նորագույն սարքավորումներով վերազինված լաբորատորիաներում ուսումնական պրակտիկա անցկացնելուց, ուսանողները կներգարավվեն նաև իրազեկման և մոնիտորինգային աշխատանքներում, հնարավորություն կստանան մասնակցելու Ծառայության կողմից իրականացվող վերահսկ ողական գործողություններին, իսկ գիտնականների, լաբորատորիաների ներուժը կներգրավվի Ծառայության խնդիրների համակողմանի լուծման գործընթացին: Կիրականացվեն համատեղ ծրագրեր, վերապատրաստման դասընթացներ, սեմինարներ: Ծառայության աշխատակիցները զեկուցումներով հանդես կգան ՀԱԱՀ-ում ավանդաբար հրավիրվող միջազգային գիտաժողովներում:
Հետևեք մեզ նաև Telegram-ում