«Ելք» դաշինքն առաջարկում է նոր խորհրդարանում պահպանել մարդու իրավունքների հանձնաժողովը

Ազգային ժողովի «Ելք» դաշինքի խմբակցությունը Ազգային ժողովում մշտական հանձնաժողովների ձևավորման սեփական որոշման նախագծին է ներկայացրել, որով առաջարկվում է սահմանել, որ նոր խորհրդարանը կունենա 10 հանձնաժողով: Որոշման նախագիծը պատգամավորների քննարկմանը ներկայացրեց «Ելք» խմբակցության պատգամավոր Էդմոն Մարուքյանը: Նա նշեց, որ իրենք համաձայն չեն ՀՀԿ-ի ներկայացրած որոշման նախագծի հետ, որի համաձայն՝ խորհրդարանը կունենա 9 հանձնաժողով: «Մենք կարծում ենք, որ անընդունելի է մարդու իրավունքների հանձնաժողովը միավորել պետաիրավական հարցերի մշտական հանձնաժողովի հետ, քանի որ պետաիրավական հարցերի մշտական հանձնաժողովն առանց այդ էլ խորհրդարանի ամենածանրաբեռնված հանձնաժողովներից մեկն է»,- նշեց Մարուքյանը:

Նա չհամաձայնեց ՀՀԿ խմբակցության պատգամավոր Հրայր Թովմասյանի այն տեսակետի հետ, որ պետաիրավական հարցերի մշտական հանձնաժողովը միշտ էլ զբաղվել է մարդու իրավունքների խնդիրներով, ուստի մարդու իրավունքների հանձնաժողովի գոյությունն անիմաստ է: «Մեր դիրքորոշումն այն է, որ մարդու իրավունքների առանձին հանձնաժողով պետք է լինի և չի կարող մարդու իրավունքների հանձնաժողովը միավորել պետաիրավական հարցերի մշտական հանձնաժողովի հետ»,– ասաց Մարուքյանը:

Պատգամավորը նաև մտահոգություն հայտնեց, որ ՀՀԿ-ն առաջարկում է 9 հանձնաժողով ձևավորել, որպեսզի «Ելք» դաշինքը խորհրդարանում որևէ մշտական հանձնաժողով գլխավորելու իրավունք չստանա, քանի որ 10-րդ հանձնաժողովը բաժին կհասնի հենց «Ելք» դաշինքին: Էդմոն Մարուքյանը խորհրդարանի ընդդիմադիր պատգամավորներին կոչ արեց պաշտպանել ոչ թե ՀՀԿ-ի, այլ իրենց ներկայացրած նախագիծը և հնարավորություն ստեղծել, որպեսզի խորհրդարանը մարդու իրավունքների հարցերով զբաղվող առանձին հանձնաժողով ունենա: