Մոսուլում ԻՊ-ի զինյալները 160-ից ավելի խաղաղ բնակիչների են սպանել քաղաքը լքելու փորձ անելիս. ՄԱԿ
Նմանատիպ
Մոսուլի արեւմտյան արվարձանում «Իսլամական պետություն» ահաբեկչական խմբավորման զինյալների կողմից 163 խաղաղ բնակիչներ, ներառյալ երեխաներ են սպանվել քաղաքից հեռանալու փորձ կատարելիս: Այդ մասին, ինչպես տեղեկացնում է «Արմենպրես»-ը, հունիսի 6-ին հայտնել է ՄԱԿ-ի մարդու իրավունքների հարցերով գերագույն կոմիսար Զեյդ Ռաադ ալ Հուսեյնը:
«Երեկ իմ աշխատակիցներն ինձ հայտնել են, որ ԻՊ-ի զինյալների կողմից 163 մարդու սպանությունից հետո, որպեսզի նրանց թույլ չտան հեռանալ արեւմտյան Մոսուլի արվարձանից, իրաքցի սպանված տղամարդկանց, կանանց ու երեխաների մարմինները շարունակում են մնալ Ալ Շիրայի փողոցներում»,-հայտարարել է նա՝ Ժնեւում ելույթ ունենալով ՄԱԿ-ի Մարդու իրավունքների խորհրդի 35-րդ նստաշրջանի բացմանը:
ՄԱԿ-ի մարդու իրավունքների հարցերով գերագույն կոմիսարի վարչությունը ենթադրում է, որ սպանությունները կատարվել են հունիսի 1-ին: Իրաքցի զինվորականներն անցած շաբաթ հայտարարել են, որ գրոհ են սկսել արեւմտյան Մոսուլի այն վերջին շրջանների վրա, որոնք գտնվում են ԻՊ-ի ահաբեկիչների հսկողության ներքո: Իրաքում ԻՊ-ի խոշորագույն պատվարի ազատագրման գործողությունը շարունակվում է 2016 թվականի հոկտեմբերից ԱՄՆ-ի գլխավորած կոալիցիայի աջակցությամբ, հաղորդել է ՌԻԱ Նովոստին:
Հետևեք մեզ նաև Telegram-ում