Հայաստանի խորհրդարանը մեկ րոպե լռությամբ համերաշխություն հայտնեց Իրանի բարեկամ ժողովրդին
Նմանատիպ
Հայաստանի Ազգային ժողովը հերթական ընդմիջումից հետո նիստը սկսեց մեկ րոպե լռությամբ՝ համերաշխություն հայտնելով Իրանի Իսլամական Հանրապետության բարեկամ ժողովրդին. Թեհրանում հունիսի 7-ին ահաբեկչություններ են տեղի ունեցել: Նիստի մեկնարկին ՀՀ ԱԺ փոխնախագահ Էդուարդ Շարմազանովը ցավով նշեց, որ Իրանի խորհրդարանում և Իմամ Խոմեյնիի դամբարանի մոտ ահաբեկչություններ են տեղի ունեցել, որոնց արդյունքում կան տուժածներ: «Մենք տեղեկատվություն ստացանք, որ Իրանի խորհրդարանում և Իմամ Խոմեյնիի դամբարանի մոտ ահաբեկչություններ են տեղի ունեցել, որոնց պատասխանատվությունը ստանձնել է «Իսլամական պետություն» ահաբեկչական խմբավորումը: Ես կարծում եմ, որ մենք պետք է դատապարտենք այդ ահաբեկչական ակտերը, մեր համերաշխությունը հայտնենք մեր բարեկամ ժողովրդին»,- ասաց Շարմազանովը:
Նա Հայաստանի Ազգային ժողովի պատգամավորների անունից համերաշխություն հայտնեց Իրանի բարեկամ ժողովրդին՝ ընդգծելով, որ ՀՀ ԱԺ բոլոր պատգամավորները դատապարտում են բարեկամ երկրում տեղի ունեցած ահաբեկչական ակտերը: «Մենք իրանի ժողովրդի հետ ենք, և մեր պատգամավորները մեկ մարդու նման պետք է դատապարտեն այդ ահաբեկչական ակտը: Ես առաջարկում եմ, որ մենք նիստը սկսենք մեկ րոպե լռությամբ՝ այդպիսով արտահայտելով մեր համերաշխությունը Իրանի ժողովրդին»,- ընդգծեց Շարմազանովը:
Տեղական ժամանակով ժամը 10:30-ին Իրանի խորհրդարան են ներխուժել 4 զինյալներ, որոնք կրակ են բացել պահապանների վրա: Ահաբեկիչները համանման գործողություններ են ձեռնարկել նաև Իմամ Խոմեյնիի դամբարանում: Դամբարանի մոտ ահաբեկիչներից մեկը գործարկել է պայթուցիկ սարք և ինքն իրեն պայթեցրել է:
Հետևեք մեզ նաև Telegram-ում