Ոստիկանապետի դիմումի համաձայն Փաստաբանների պալատում նշանակվել է ծառայողական քննություն
Նմանատիպ
ՀՀ ոստիկանապետ Վլադիմիր Գասպարյանի դիմումի համաձայն Փաստաբանների պալատի նախագահը նշանակել է ծառայողական քննություն:
Հունիսի 30-ին լրագրողների հետ ճեպազրույցում այս մասին ասաց ՀՀ փաստաբանների պալատի նախագահ Արա Զոհրաբյանը:
«Դիմումին արձագանքել ենք նույն օրը: Նշված փաստերը կվերլուծվեն և իրավական գնահատական կտրվի»,- ասաց Զոհրաբյանը:
ՀՀ փաստաբանների պալատի նախագահը նաև ստացել է ՊՊԾ գնդի գրավման գործով Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանը դիմումը. մեկամսյա ժամկետում պետք է քննարկվի կարգապահական վարույթ հարուցելու հարցը:
Հունիսի 29-ին ՀՀ ոստիկանության պետ Վլադիմիր Գասպարյանը դիմել է ՀՀ փաստաբանների պալատի նախագահ Արա Զոհրաբյանին՝ ստուգելու փաստաբան Մուշեղ Շուշանյանի արարքում կարգապահական խախտման հատկանիշների առկայությունը և այդպիսիք հայտնաբերելուց հետո նրա նկատմամբ կիրառելու համարժեք կարգապահական ներգործության միջոց:
Ոստիկանությունը գտնում է, որ փաստաբանը խախտել է փաստաբանների վարքագծի կանոնակարգի 2.2.3 կետի պահանջը, համաձայն որի մասնագիտական, հասարակական, հրապարակախոսական և այլ բնագավառներում իր գործունեությամբ փաստաբանը պետք է նպաստի փաստաբանի մասնագիտության բովանդակության և հասարակական կոչման նկատմամբ հարգանքի ձևավորմանն ու ամրապնդմանը:
Նույն օրը ՀՀ փաստաբանների պալատ նամակով դիմել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանը` ոստիկանության պարեկապահակային գնդի տարածքը գրաված զինված խմբի գործով դատական նիստին փաստաբանների մասնակցությամբ միջադեպի առնչությամբ:
Հետևեք մեզ նաև Telegram-ում