«168 ժամ». Հայաստանի և ԵՄ-ի միջև համագործակցությունը ոչ մի կերպ չի հակասում ռուսական շահերին

«Հայաստանի և ԵՄ-ի միջև համագործակցությունը ոչ մի կերպ չի հակասում ռուսական շահերին, այդ իսկ պատճառով Ռուսաստանի կողմից նետված ցանկացած քար աշխատելու է հենց հակառուսական տրամադրվածությունների ուժգնացման ուղղությամբ: Ընդհակառակը՝ 2017-ի նոյեմբերին սպասվող ԵՄ-Հայաստան շրջանակային համաձայնագրի ստորագրման հանդեպ իր չեզոք դիրքով Ռուսաստանը բոլորին ցույց կտա, որ նա չունի modus operandi` «շունը՝ խոտի դեզի վրա», այն ամենը, ինչը չի սպառնում իր շահերին, ամեն ինչը, ինչը դաշնակցի և ռազմավարական գործընկերոջ օգտին է, պետք է հավանության արժանանա Մոսկվայի կողմից: Նման դիրքորոշման հիմքում շատ ուժեղ պրագմատիկ քայլ է, որը նպաստելու է այն միֆի վերացմանը, թե Ռուսաստանը, կայսերական նկրտումներից ելնելով, ընդլայնվում է՝ հանուն ընդլայնման»,- «168 ժամ»-ի թղթակցին ասել է բանակցային գործի մասնագետ, CM&Partners ընկերության ավագ խորհրդատու, բոստոնաբնակ Արթուր Մարտիրոսյանը՝ պատասխանելով հարցին՝ արդյոք ԵՄ-Ռուսաստան նոր պատժամիջոցների ֆոնին Մոսկվան խանդո՞տ է վերաբերվում ԵՄ-ՀՀ նոր շրջանակային համաձայնագրի սպասվող ստորագրմանը, արդյոք այն վտանգված է:

Ըստ նրա՝ մենք ապրում ենք որոշ ավանդական փոխգործակցության սխեմաների ու արձանագրությունների «կոտրման» ժամանակներում, պաշտոնատար անձանց հաղորդագրությունները ընդհուպ մինչև նախագահներ, սոցցանցերում կարող են ջրի մեջ փոթորիկ առաջացնել՝ ինչպես վերջին շրջանում ՀՀ իշխանությունների և ՀՀ-ում ԵՄ դեսպանի հեռակա փոխադարձ հայտարարությունները. «ԵՄ դիվանագիտական առաքելության ղեկավարը պետք է համապատասխան կոնվենցիաներով ամրագրված նորմերը պահպաներ: Լեհական կողմի համար ընդունելի կլինե՞ր, եթե այդ երկրում Հայաստանի դեսպանը սկսեր հրապարակավ մեկնաբանել ենթադրվող փոփոխությունները Լեհաստանի Սահմանադրությունում»:

Հետևեք մեզ նաև Telegram-ում