Հակակարկտային ցանցերի, կաթիլային համակարգերի ներմուծման ժամանակ հարկման արտոնությունների հարցը քննարկվում է. Իգնատի Առաքելյան

Կառավարությունը կքննարկի հակակարկտային ցանցերի, կաթիլային համակարգերի, ինտենսիվ այգիների հետ կապված օժանդակող նյութերի ներմուծման ժամանակ ավելացված արժեքի հարկի և մաքսատուրքի մասով արտոնություն տրամադրելու հարցը և որոշման նախագիծը կներկայանի վարչապետի հաստատմանը: Այդ մասին կառավարության նիստից հետո լրագրողների հետ զրույցում նշեց Գյուղատնտեսության նախարար Իգնատի Առաքելյանը՝ անդրադառնալով գործադիրի նիստում այս ուղղությամբ հնչեցված ՀՀ վարչապետի հանձնարարականին: «Նպատակն այն է, որ ժամանակավոր արտոնություն տրվի, մինչև Հայաստանում արտադրություն սկսվի: Ժամկետների հարցը դեռ պետք է քննարկվի»,- «Արմենպրես»-ի փոխանցմամբ, ասաց նախարարը՝ ավելացնելով, որ ներկայում Հայաստանում կաթիլային համակարգի արտադրություն առկա է, իսկ հակակարկտային ցանցերի հետ կապված ակտիվ քննարկումներ են ընթանում:

«2-3 ընկերություն ցանկանում է ներդնել և՛ ցանցերի, և՛ երկաթբետոնե շպալերների արտադրություն: Սա կարող է 20-30 տոկոսով նվազեցնել ինտենսիվ այգիների ծախսը»,- նկատեց Իգնատի Առաքելյանը: