ՀՀԿ-ն վարչապետի իր թեկնածուին կառաջարկի, երբ կավարտվեն նախագահի լիազորությունները
Նմանատիպ
Ազգային ժողովի ՀՀԿ խմբակցության պատգամավոր Հակոբ Հակոբյանը չի շտապում գնահատական տալ ՀՀ վարչապետ Կարեն Կարապետյանի աշխատանքին: Ազգային ժողովում լրագրողների հետ զրույցում Հակոբ Հակոբյանն ընդգծեց, որ այս պահի դրությամբ ներկայացված տնտեսական ցուցանիշները նախնական են, իսկ վարչապետի աշխատանքը գնահատելու համար հարկավոր է ամբողջական պատկեր ունենալ:
«Եթե բյուջեի կատարողականի ցուցանիշները լավն են, ուրեմն վարչապետը լավ է աշխատել: Վերջնական արդյունքները շատ պարզ են. համեմատում ես պետական բյուջեի ծրագրերում ունեցած պարտավորությունները և բյուջեի ձեռք բերած փաստացի կատարողականի ցուցանիշները: Համեմատում ես և վարչապետի գնահատականը պարզ է դառնում»,- ասաց պատգամավորը:
Անդրադառնալով գործող վարչապետի փոփոխության հարցին՝ Հակոբ Հակոբյանը հիշեցրեց նոր Սահմանադրությունը, ըստ որի վարչապետն ունենալու է նոր լիազորություններ։ «Ազգային ժողովը 2018 թվականից դառնալու է թիվ 1 պետական մարմինը, և ՀՀԿ-ն, որպես ԱԺ-ում առաջին քաղաքական ուժ, իր որոշումը կունենա այն ժամանակ, երբ Հանրապետության Նախագահի լիազորություններն ավարտվեն»,- ասաց նա:
Լրագրողների հարցին՝ Կարեն Կարապետյանը կարո՞ղ է լինել ՀՀ հաջորդ վարչապետը, Հակոբ Հակոբյանը կեսկատակ արձագանքեց. «Ես էլ կարող եմ լինել, բոլորն էլ կարող են լինել: Կուսակցությունը կունենա որոշում: Եթե Սերժ Սարգսյանը ցանկանա, ինքն անպայման կլինի, որովհետև ինքն է կուսակցության ղեկավարը և հենց կուսակցության ղեկավարը պետք է լինի պատասխանատու»:
Հետևեք մեզ նաև Telegram-ում