«Ծառուկյան» դաշինքը պատրաստ է քննարկել ՀՀ-ն ԵԱՏՄ կազմից դուրս բերելու «Ելք»-ի օրինագիծը

«Ծառուկյան» դաշինքը պատրաստ է քննարկել ՀՀ-ն ԵԱՏՄ կազմից դուրս բերելու «Ելք»-ի օրինագիծը

Ազգային ժողովի «Ծառուկյան» խմբակցությունը պատրաստ է քննարկել Հայաստանը ԵԱՏՄ կազմից դուրս բերելու գործընթաց սկսելու՝ «Ելք» խմբակցության առաջարկը: Ազգային ժողովում լրագրողների հետ զրույցում այս մասին ասաց ԱԺ «Ծառուկյան» խմբակցության պատգամավոր Միքայել Մելքումյանը: «Գործընկեր ցանկացած քաղաքական ուժի առաջ քաշած օրինագիծ արժանի է քննարկման: «Ելք»-ի ներկայացրած օրինագծի քննարկումների ժամանակ ես մի քանի հարցադրումներ կանեմ: Արդյոք կա՞ն համարժեք հիմնավորումներ առ այն, թե ինչպիսին են ռիսկերը, եթե Հայաստանը որոշի դուրս գալ ԵԱՏՄ-ից: Օրինակ՝ քանի՞ հարյուր հազար մարդ է աշխատում ՌԴ-ում, որոնք պրոբլեմներ կունենան անդամակցության կասեցումից հետո: Հարց է առաջանում նաև, թե ի՞նչ կկատարվի ամսական 150-180 միլիոն դոլար տրանսֆերտների հետ: Նաև կան հարցեր մեր անվտանգության համակարգի հետ կապված»,- ասաց Մելքումյանը:

Միևնույն ժամանակ, Միքայել Մելքումյանը նշեց, որ իրենք պատրաստ են քննարկել այդ օրինագիծը, սակայն դրանից իրենց կարծիքը չի փոխվում ԵԱՏՄ-ին Հայաստանի անդամակցության վերաբերյալ: «Մենք կողմ ենք քվեարկել Հայաստանի անդամակցությանը ԵԱՏՄ-ին։ Կողմ ենք դրան, որովհետև հարցին համալիր պետք է նայել, մինչև չտեսնենք՝ ինչպես են գնահատվում ռիսկերը և ապագա ռիսկերն ինչպես են կառավարվելու, այդ հարցը դեռևս արդիականություն չունի», – հավելեց Մելքումյանը։

Հետևեք մեզ նաև Telegram-ում