Կառավարությունն իրականացրել է խելամիտ հարկաբյուջետային քաղաքականություն. Վարդան Արամյան

Հայաստանի կառավարությունը 2017 թ. նախագծել և իրականացրել է խելամիտ հարկաբյուջետային քաղաքականություն, ինչի մասին է վկայում միջազգային կառույցների արձագանքն այդ քաղաքականությանը: Սեպտեմբերի 25-ին լրագրողների հետ հանդիպմանն այս մասին ասաց ՀՀ ֆինանսների նախարար Վարդան Արամյանը՝ ներկայացնելով նախարարության մեկ տարվա գործունեությունը:

«Դուք գիտեք, որ մենք երկու տարի՝ 2014-2015 թթ. լուրջ ճգնաժամի մեջ ենք եղել, այդ ընթացքում 13 տոկոսով ավելացել է մեր արտաքին պարտքի ցուցանիշը: Եթե մենք հետագա տարիներին ևս շարունակեինք ավելացնել պարտքը, բնականաբար, դրան կհետևեր միջազգային կառույցների, մեր պարտատոմսերում ներդրում կատարողների բացասական արձագանքը, սակայն մենք կարողացանք 2017 թ. նախագծել և իրականացնել հարկաբյուջետային այնպիսի քաղաքականություն, որն ապահովեց դրական միտումներ»,- նշեց նախարարը:

Նա ընդգծեց, որ «Մուդիս»-ը, «Ֆիտչ»-ը, Արժույթի միջազգային հիմնադրամը դրական են արձագանքել այն հարկաբյուջետային քաղաքականությանը, որն իրականացրել է Հայաստանի կառավարությունը: Նախարարը վստահեցրեց, որ այդ քաղաքականությանը դրական են արձագանքել նաև պարտատոմսերի միջազգային շուկայում Հայաստանի պարտատոմսերում ներդրումներ իրականացնողները: «Սա խոսում է այն մասին, որ մեր գործողություններն արդյունավետ են եղել, և մենք կարողացել ենք հաղթահարել ճգնաժամի արդյունքում առաջ եկած դժվարությունները և կայունացնել իրավիճակը»,- նշեց Արամյանը: