«Ժողովուրդ». Ոստիկանության և Քննչական կոմիտեի միջև ներքին լարվածության արդյունքում տուժում է քաղաքացին

«Ժողովուրդ». Ոստիկանության և Քննչական կոմիտեի միջև ներքին լարվածության արդյունքում տուժում է քաղաքացին

«Ժողովուրդ»-ում կարդում ենք. «Ոստիկանությունը երեկ հաղորդագրություն տարածեց՝ տեղեկացնելով, որ բացահայտվել է հոկտեմբերի 9-ի վաղ առավոտյան «Կոնվերսբանկ» ՓԲԸ-ի Սայաթ-Նովա մասնաճյուղի վրա կատարված ավազակային հարձակումը: Այս գործով երեք հոգի ձերբակալվել է, մեկը գտնվում է հետախուզման մեջ: Բայց նկատենք՝ գողության դեպքն ամբողջովին չի բացահայտված, քանի որ չկա ամենակարևորը` գողն ու գողոնը:

Ու սա առաջին նման դեպքը չէ, և կատարվածը հիշեցնում է ՀՀ պաշտոնյաների տունը թալանած հայտնի «Բանդայի գործը», որի անդամները տարիներ շարունակ պնդում էին, որ իրենց գլխին գործ են սարքել: Ստեղծված իրավիճակը պատահական չէ, և ավելի շատ հետևանք է ոստիկանության և քննչական կոմիտեի միջև ներքին լարվածության, համագործակցության բացակայության, որի արդյունքում տուժում է քաղաքացին: Ի դեպ, դեռ հոկտեմբերի 9-ին Սերժ Սարգսյանը, ՔԿ ծառայողի օրվա առթիվ անդրադարձել էր այս խնդրին՝ կարևորելով հանցագործությունների ամբողջական բացահայտումը: Բայց, փաստորեն, այս ելույթը որևէ բան չի փոխել իրավապահ համակարգում:

Պետք է նկատել, որ կատարված կողոպուտը բացահայտված կլիներ այն ժամանակ, երբ հայտնի դառնար, որ իսկապես Ցիգանկովն է բանկ մտնում՝ տեսանյութ-ապացույցով, և հայտնաբերվեր ամենակարևորը՝ գողոնը, սակայն ո՛չ գողը կա, ո՛չ գողոնը: Էլ չասած, թե ինչպե՞ս է գրավոր սպառնացել, կամ ո՞ր տեքստն է համարվում սպառնալիք, և ինչո՞ւ է կառավարիչը վախեցել անզեն մարդուց»:

Հետևեք մեզ նաև Telegram-ում