Սյունիքում ազատ տնտեսական գոտին կնպաստի Իրանի հետ տնտեսական կապերի ամրապնդմանը

Սյունիքում ազատ տնտեսական գոտին կնպաստի Իրանի հետ տնտեսական կապերի ամրապնդմանը

Հայաստանում ստեղծված են բարենպաստ պայմաններ, որոնք թույլ են տալիս շահավետ ներդրումներ կատարել ու հաջողությամբ գործարարությամբ զբաղվել։ Հայաստանում հայ-իրանական գործարար համաժողովի բացմանը այս մասին ասաց ՀՀ արտաքին գործերի նախարար Էդվարդ Նալբանդյանը:

«Նման համաժողովները կարեւոր հարթակ են երկու երկրների պետական ու գործարար շրջանակների ներկայացուցիչների համար՝ քննարկելու երկկողմ առևտրատնտեսական ոլորտում առկա հնարավորություններն ու խնդիրները, որոշելու մեր երկրների միջեւ համագործակցության խթանման նպատակով ձեռնարկվելիք քայլերը: Հուսով եմ, որ այս համաժողովը կնպաստի իրանական գործարարների կողմից Հայաստանի ներդրումային հնարավորությունների առավել գործադրմանը: Հայաստանում իրականացվող բարեփոխումները նախատեսում են ամրագրել առավել բարենպաստության ռեժիմներ, հստակեցնել օտարերկրյա ներդրողներին տրվող երաշխիքները, հնարավորություն տալ գործարարներին օգտվելու Հայաստանում գործող ու նախատեսվող լրացուցիչ արտոնություններից, ներդրումային վեճերի լուծման ժամանակակից մեխանիզմներից, հետևողականորեն կրճատել ու պարզեցնել մի շարք ընթացակարգեր», – նշեց նա:

Էդվարդ Նալբանդյանի խոսքով՝ Հայաստանում ներդրումներ կատարելու առավելություններից է այն, որ մեր երկիրն ունի առևտրի արտոնյալ ռեժիմ բազմաթիվ երկրների հետ։ Նա նշեց, որ մասնավորապես, Եվրասիական տնտեսական միությանը Հայաստանի անդամակցությամբ ստեղծվել են նոր հնարավորություններ:

«Հայաստանում արտադրված ապրանքները զրոյական մաքսատուրքերով՝ առանց վարչարարական խոչընդոտների, կարող են ազատ մուտք գործել Եվրասիական տնտեսական միության անդամ երկրների 180 միլիոնանոց սպառողական շուկա։ Բացի այդ, մեր երկիրն ունի ազատ առևտրի համաձայնագրեր գրեթե բոլոր երկրների հետ», – նշեց ՀՀ արտգործնախարարը:

Նա ընդգծեց, որ Հայաստանը, հանդիսանալով ԵԱՏՄ երկրներից միակը, որն ունի ցամաքային սահման Իրանի հետ, կարող է դարպաս հանդիսանալ դեպի ԱՊՀ, ԵԱՏՄ երկրներ, նաեւ՝ Եվրամիություն մուտք գործելու համար։

«Այդ առումով կարևորում ենք իրականացման փուլում գտնվող Հյուսիս-հարավ ճանապարհային միջանցքի նշանակությունը՝ որպես Պարսից ծոցի նավահանգիստները Սև ծովի նավահանգիստներին կապող ամենակարճ տարանցիկ երթուղի: Հայաստանը նաեւ ակտիվորեն աջակցում է ԵԱՏՄ-ի ու Իրանի միջև ազատ առևտրի գոտու մասին համաձայնագրին»,-ասաց Էդվարդ Նալբանդյանը՝ խոսելով նաեւ Սյունիքում Իրանի հետ սահմանին ազատ տնտեսական գոտու ստեղծման մասին, որը, նրա խոսքով, կնպաստի Իրանի հետ տնտեսական կապերի ամրապնդմանը, ՀՀ տնտեսական ներուժի առավել արդյունավետ օգտագործմանը։

«Երկու երկրների պատկան մարմինների կողմից ստորագրվել է փոխըմբռնման հուշագիր, որի նպատակն է սահմանել Հայաստանի ու Իրանի միջև ազատ տնտեսական գոտիների ոլորտում համագործակցության հիմնական ուղղությունները», – եզրափակեց ՀՀ արտգործնախարարը:

Հետևեք մեզ նաև Telegram-ում