ԵԱՏՄ Մաքսային օրենսգիրքը հիմնված է էլեկտրոնային կառավարման մոդելի վրա
Նմանատիպ
Եվրասիական տնտեսական Միության նոր Մաքսային օրենսգիրքը հիմնված է էլեկտրոնային կառավարման մոդելի վրա: Ազգային ժողովում ԵԱՏՄ Մաքսային օրենսգիրքը վավերացնելու հարցի քննարկմանն այս մասին ասաց ՀՀ կառավարությանն առընթեր պետական եկամուտների կոմիտեի նախագահի տեղակալ Վախթանգ Միրումյանը՝ պատասխանելով ՀՀԿ խմբակցության պատգամավոր Ջեմմա Բաղդասարյանի հարցին: «Սա օրենսգրքի հիմնական առավելություններից մեկն է, որն էապես նվազեցնում է տնտեսավարող սուբյեկտի, բիզնեսի այլընտրանքային ծախսերը»,– նշեց Միրումյանը:
ՊԵԿ փոխնախագահը հիշեցրեց, որ դեռևս 2016 թ. դեկտեմբերին ներդրել են մաքսային արժեքի որոշման էլեկտրոնային հայտարարագիրը, իսկ 2017 թ. կեսերից՝ մաքսային հայտարարագրման էլեկտրոնային տարբերակը, ինչի արդյունքում ցանկացած ֆիզիկական անձ կարող է ստանալ ծածկագիր, կնքել համապատասխան համաձայնագիր էլեկտրոնային եղանակով հայտարարագիրը ներկայացնելու վերաբերյալ և ներկայացնել:
«Սրանք, ըստ էության, մաքսային հայտարարագրման գործընթացի երկու հիմնական փաստաթղթերն են՝ մաքսային արժեքի որոշման վերաբերյալ հայտարարագիրը և մաքսային հայտարարագիրը: Եվրասիական տնտեսական միության Մաքսային օրենսգիրքը նախատեսում է ոչ միայն սահմանափակվել այս երկու փաստաթղթով, այլ բոլոր տիպի փաստաթղթերով: Իհարկե, մենք սրան պատրաստ ենք, որպեսզի բոլոր աշխատանքները իրականացնենք մինչև 2020 թ.»,– ասաց ՊԵԿ փոխնախագահը:
Նա վստահեցրեց, որ ամեն ինչ անելու են, որպեսզի տնտեսավարողները ևս պատրաստ լինեն նոր պայմաններով և մեթոդներով աշխատանքին: «Մենք իրազեկման և այլ աշխատանքների միջոցով ամեն ինչ կանենք, որպեսզի նրանք հնարավորինս արագ պատրաստ լինեն ամբողջությամբ էլեկտրոնային համակարգի անցնելուն»,- եզրափակեց Միրումյանը:
Հետևեք մեզ նաև Telegram-ում