«Ժողովուրդ». Ապրիլյան պատերազմի օրերին զորամասից գողացված փամփուշտները հայտնաբերվել են

Ապրիլյան քառօրյա պատերազմից հետո եղան նաև պաշտպանության բանակի զորամասերից ռազմամթերքների անհետացման դեպքեր. ենթադրվում էր՝ որպես կամավոր ռազմաճակատ մեկնածները զենքն իրենց հետ տարել են։ Զենքերի անհետացման կապակցությամբ նույնիսկ Արցախի դատախազությունում քրեական գործեր էին հարուցել։ 

«Ժողովուրդ»-ը տեղեկացել է, որ հարուցված քրեական գործերից մեկի շրջանակներում բացահայտվել է՝ Երևանի բնակիչ Լ. Գևորգյանը 2016 թվականի ապրիլի 10-ից 2016 թվականի մայիսի 19-ն ընկած ժամանակահատվածում՝ Արցախի հանրապետության պաշտպանական գործողությունների ընթացքում, գտնվել է Քարվաճառի շրջանում ուսումնական նպատակով ժամանակավոր ստեղծված լեռնադաշտավայրային հրաձգարանում, որտեղից էլ ապօրինի զենք է ձեռք բերվել՝ 176 հատ գործարանային արտադրության մարտական փամփուշտ, ինչը այս տարվա օգոստոսին հայտնաբերվել է նրա բնակավայրում, և Գևորգյանին մեղադրանք է առաջադրվել։ Հիմա քրեական գործը դատարանում է։