Երրորդ երկրներից Հայաստան մեքենաների ներմուծման մաքսատուրքերի բարձրացում այս տարի նախատեսված չէ
Նմանատիպ
Երրորդ երկրներից Հայաստան ավտոտրանսպորտային միջոցների ներմուծման դեպքում մաքսային սակագների փոփոխություն այս տարի նախատեսված չէ: «Լրագրողների հետ հանդիպմանն ասաց ՊԵԿ սակագնային կարգավորման և հսկողության բաժնի գլխավոր մաքսային տեսուչ Տիգրան Մինասյանը: «Երրորդ երկրներից ավտոտրանսպորտային միջոցների ներմուծման առնչությամբ որևէ սակագնային փոփոխություն այս տարվա համար նախատեսված չէ, հետևաբար թանկացումներ չեն լինի»,-ասաց Տիգրան Մինասյանը:
Նա հավելեց, որ ԵԱՏՄ անդամակցությամբ պայմանավորված մեքենաների համար մաքսատուրքերի բարձրացում սահմանված է 2020 թվականից: «Մինչև 2020 թվականը մեզ մոտ գործելու են մեր նախկին սակագները, որոնք առկա էին մինչ ԵԱՏՄ անդամ դառնալը, գանձվող մաքսային վճարների բոլոր սակագնային փոփոխությունները կատարվելու են 2020 թվականից»,-ավելացրեց ՊԵԿ պաշտոնյան:
Պետեկամուտների կոմիտեն հունվարի 8-ից իր պաշտոնական petekamutner.am կայքում այսուհետ հրապարակում է տեղեկատվություն երրորդ երկրներից մեքենաների ներմուծման մաքսային արժեքների վերաբերյալ: Տվյալներին ծանոթանալու համար անհրաժեշտ է մուտք գործել petekamutner.am կայքի «Մաքսային տեղեկատվություն» բաժին, այնուհետև «Տեղեկատվություն ԱՏԳ մասնակիցների համար»-«Տեղեկատվություն ավտոտրանսպորտային միջոցների արժեքի վերաբերյալ»:
Հետևեք մեզ նաև Telegram-ում