Գյուղմթերքի ինքնարժեքի վրա դիզվառելիքի թանկացումն էական ազդեցություն ունենալու պարագայում կմշակվի սուբսիդավորման ծրագիր

Գյուղատնտեսության նախարարի տեղակալ Ռոբերտ Մակարյանը վստահեցնում է, որ դիզվառելիքի թանկացումն էական ազդեցություն չի ունենա գյուղմթերքների գների վրա: Կառավարության նիստից հետո լրագրողների հետ զրույցում փոխնախարարն ասաց, որ եթե դիզվառելիքի թանկացումն էական ազդեցություն ունենա գյուղմթերքի ինքնարժեքի վրա, ապա կմշակվի սուբսիդավորման ծրագիր:

«Ըստ նախնական հաշվարկների՝ վառելիքի թանկացումը բերելու է կարտոֆիլի գնի ընդամենը 2 դրամով ավելացման: Դրա համար մենք կատարելու ենք վերլուծություններ, գների մոնիտորինգ գյուղմթերքի շուկաներում: Եթե խնդիրը լինի ռիսկային, պետք է սուբսիդավորել, դրա վերաբերյալ կա հանձնարարական»,- ասաց Մակարյանը՝ ավելացնելով, որ իրենք խնդիր ունեն մրցունակ դարձնելու գյուղմթերքը.

«Մեր բոլոր ծրագրերը՝ լիզինգի, ինտենսիվ այգիների, կաթիլային ոռոգման, վարկերի ծրագրերը հենց ուղղված են մրցունակության բարձրացմանը: Առաջիկայում գյուղմթերքների մասով սոցիալական ապրանքների ցանկ կներկայացվի կառավարություն, ինչպես նաև՝ համալիր ծրագիր տեղական արտադրության խթանման ու ներմուծման փոխարինման ուղղությամբ: Եղել են ապրանքներ, որ թանկացել են, կան նաև բազմաթիվ ապրանքներ, որոնք էժանացել են: 2017 թվականը չորային էր, ոռոգման հետ կապված խնդիրներ կային, ուստի ժամանակավորապես գները բարձրացել են, բայց դա ժամանակավոր երևույթ է, որովհետև, օրինակ, կարտոֆիլի գնի որոշակի բարձրացում է նկատվել դեկտեմբերին, բայց գյուղացիներն ունեն ամբարված պաշար, որը կմտնի շուկա, և գների նվազում կլինի: Պանիր, թռչնամիս արտադրողների հետ հանդիպում կլինի, որ հասկանանք, թե ինչով է պայմանավորված գների բարձրացումը»,- ասաց նա՝ ավելացնելով, որ հիմնականում դա պայմանավորված է կերի թանկացման հետ:

Հարկային օրենսգրքի փոփոխություններով պայմանավորված՝ հունվարի 1-ից բարձրացել է դիզվառելիքի ակցիզային հարկը, որի հետևանքով Հայաստանում դիզելային վառելիքի գները բարձրացել են շուրջ 40 դրամով: