AM | RU
USD
EUR
RUB

Ափսոս, հազար ափսոս, որ Վրաստանի իշխանությունները ռուսամետ չեն

 
 

Ափսոս, հազար ափսոս, որ Վրաստանի իշխանությունները ռուսամետ չեն: Այլապես` մերօրյա սահակաշվիլիապաշտների, այն է` արևմուտքից հանապազօրյա հացը հայթայթող զանգվածի համար կբացվեր գործունեության լայն դաշտ: Գտնվելով ՀՀ սահմանների հարևանությամբ, այդ դաշտում գործելը և' նվազ ծախսատար կլիներ, և' չափազանց եկամտաբեր:

Իսկ մերօրյա սահակաշվիլիաֆիլները, անխոսք, կստանձնեին Վրաստանի դեմ պայքարողների դրոշակակիրների դերը: Պայքար` բոլոր ուղղություններով: Մշակութային ոլորտում, օրինակ, վրացական իշխանությունները խստիվ կդատապարտվեին երկրի սահմաններով հայատառ գիրք-գրականությունը և մշակութային այլևայլ իրերը զանգվածորեն արգելելու համար: Ավելի'ն, սահակաշվիլիաֆիլները չէին բավարարվի այդքանով, նրանք ՀՀ տարբեր վայրերում կնախաձեռնեին զանգվածային գրքահավաքներ և գրքերով, հումանիտար օգնության իրերով բեռնված մեքենաների շարասյունը կուղղեին դեպի Բավրայի սահմանային անցակետ: Պարզ է` Վրաստանի իշխանությունները կրկին արգելելու էին գրքերի մուտքը Վրաստան (Ջավախք): Այդ քայլին կհետևեր մերօրյա սահակաշվիլիաֆիլների կատաղի գործողությունները. վերջիններս, ի նշան բողոքի, գրքերը կդասավորեին ՀՀ -Վրաստան սահմանի երկայնքով, կփորեին խրամաբջիջներ և գիշեր ու զօր հերթապահություն կսահմանեին այնտեղ: Համեմատաբար խոշոր տրամաչափի իրերը` թերթերը, ուսումնական պաստառները և քարտեզները նրանք հատուկ պատրաստված մետաղալարերով կկախեին Վիրահայոց լեռների գագաթների ողջ երկայնքով, այն է` ՀՀ -Վրաստան սահմանագծով, որպեսզի առավել ցայտուն ընդգծվեր ամեն ինչ: Նույն լեռնագագաթների` Լոքի լեռնանցքային հատվածում, դեմքերը դեպի արևելք, դեպի հեռուն նշմարվող Վրաստանի մայրաքաղաքը, զուռնայի զիլ հնչյունների և վրաց սահմանապահ զորքերի հայացքների ներքո մերօրյա սահակաշվիլիաֆիլները կբռնեին ավանդական քոչարին: Բնականաբար` այդ «զիլ» օրերին իրենց ակտիվությամբ աչքի կընկնեին ինչպես արևմտյան մի շարք երկրների դեսպանները, այնպես էլ ԵԽ-ի, ԵՄ-ի տարածաշրջանային ներկայացուցիչները, ովքեր պարբերաբար կայցելեին ինչպես Բավրայի անցակետ, այնպես էլ կմագլցեին Վիրահայոց լեռներ` հայոց թերթերին ու միտինգավորներին ի տես: Վերջիններս ակտիվ կապի մեջ կլինեին նաև իրենց վրաստանյան գործընկերների հետ, ովքեր հայաբնակ Ջավախքից ժամ առ ժամ տեղեկություններ ու փաստեր կփոխանցեին ժողովրդավարական արժեքների ոտնահարման, Տեղաշրջանային լեզուների մասին կոնվենցիան չվավերացնելու պատճառով հայերենը իրավական գործածությունից դուրս դնելու, հասարակական-մշակութային գործիչների շրջանում իրականացվող հետապնդումների, մարդու, տեղաբնիկ ժողովուրդների և փոքրամասնությունների իրավունքներին վերաբերող մի շարք հռչակագրեր ու կոնվենցիաներ ոտնահարելու և բազմաթիվ այլ իրողությունների մասին:

Այս բոլորը` սահմանին ու լեռներում, իսկ Երևանում սահակաշվիլիաֆիլներին սպասարկող կայքերը, լրատվական ցանցերն ու միջոցները շուտափույթ շրջանառության մեջ կդնեին Ս. Սարգսյանի, Վ. Պուտինի ու Մ. Սահակաշվիլու (կամ Գ. Մարգվելաշվիլու) եռանկարը, որի համապատկերին կլինեին խոսքի ու մամուլի ազատության սահմանափակումը, գրաքննությունը, հասարակական մտքի վրա ճնշումը խորհրդանշող տեսարաններ: Որոշ քաջարի սահակաշվիլիաֆիլներ ավելի հեռուն կգնային. վերջիններս կվերհիշեին քեմալաբոլշևիկյան սիրախաղերը, Հայաստանի առաջին հանրապետության կործանումը, այնուհետև Վրաստանի ռուսամետ ղեկավարությանն ու Վլ. Պուտինին կներկայացնեին Մ. Քեմալ - Վ. Լենին դաշնազույգի հոգևոր զավակների տեսքով, ովքեր արնոտ դաշույններով ցեղասպանության են ենթարկում ջավախահայությանը:

Նշյալ կայքերում կտեսնեինք նաև Վրաստանում ստալինիզմի վերածնությունը խորհրդանշող պատկերներ, Մ. Սահակաշվիլու տարիներից մինչ օրս Վրաստան մուտքի իրավունքից զրկված մտավորականների, հասարակական գործիչների կամ գիտնականների` Հայկական հանրագիտարանի գլխավոր խմբագիր Հովհ. Այվազյանի, ԱԺ պատգամավոր Շ. Թորոսյանի, հուշարձանագետ Ս. Կարապետյանի և իր աշխատակիցների, սպորտային մեկնաբան Կ. Գիլոյանի, ՀՊՄՀ-ի գիտական գրադարանի տնօրեն Տ. Պետրոսյանցի, «Երկիր Մեդիա» հ/տ-ն լրագրողների և այլոց դիմապատկերները կդրվեին Գ. Մահարու, Վ. Ալազանի, Վ. Նորենցի, Ա. Ահարոնյանի, Ն. Աղբալյանի, Լևոն Շանթի և այլոց լուսանկարների կողքին, այդպիսով զուգահեռներ անցկացնելով խորհրդային - ստալինյան և վրացական ռեժիմների միջև, որոնց ժամանակ հայրենիքից արտաքսվել կամ սեփական հայրենիք ազատ մուտքի իրավունքից զրկվել են բազմաթիվ հայազգի գործիչներ: Մերօրյա սահակաշվիլիաֆիլների աչքից չէին վրիպի նաև նույն ռեժիմների հայազգի կամակատարները, որոնք ևս հանրությանը կներկայացվեին «սինթեզված», օրինակ, Վ. Բայբուրդի զուգահեռականում կարող էր ներկայացվել Ա. Նուրիջանյանը և այսպես շարունակ:

Շարունակելով ներկայացնել մերօրյա սահակաշվիլիաֆիլների հնարավոր ձեռնարկների մասին` նշենք, որ, դատափետելով ու մերկացնելով Վրաստանի ռուսամետ ղեկավարությանը, նրանց զանգվածային գործողությունների մեջ մեծ տեղ կգրավեին Ջավախքի անցյալի ու ներկայի խնդիրների մասին հանրության շրջանում զանգվածային իրազեկմանն ուղղված միջոցառումները: Այսպես, Երևանի ճոխ հյուրանոցներից մեկի սրահում` հայտնի արևմտյան ժողովրդավարական ինստիտուտների ու միջազգային հեղինակավոր կառույցների ներկայացուցիչների մասնակցությամբ, կմեկնարկեր եռօրյա խոշոր խորհրդաժողով, որտեղ ջրի երես կհանվեին Վրաստանում ազգային բնիկ ժողովուրդների և ազգային փոքրամասնությունների խնդիրները, կետ առ կետ քննարկման կարժանանային Վրաստանի իշխանությունների բոլոր այն քայլերը, որոնք միտված են ձուլման ենթարկել երկրի ոչ տիտղոսային ազգություններին: Խորհրդաժողովին առնվազն 3 լեզվով թարգմանված կներկայացվեին ջավախահայության` սեփական խնդիրները ներկայացնող մի շարք բողոքագրեր ու առաջարկներ: Ավարտին խորհրդաժողովի մասնակիցները հանդես կգային Վրաստանի իշխանությունների հասցեին ուղղված դատապարտող հայտարարությամբ, հատուկ պատժամիջոցների կիրառման սպառնալիքներով և հատուկ մամուլի ասուլիսներով:

Խորհրդաժողովին կհաջորդեին կամ կնախորդեին արևմտյան դրամաշնորհներով կազմակերպվող առանձին գիտաժողովներ, որոնց ընթացքում հայրենասիրական փոթորկուն ելույթներով ևս մեկ անգամ կվերահաստատվեին Կարս-Ախալքալաք-Բաքու երկաթուղու հայակործան հետևանքները, Ջավախքի ժամ առ ժամ թրքացումը, Թուրքիայի և Ադրբեջանի` Վրաստանի հարավով ցամաքային միջանցքի ստեղծմանբ ՀՀ շրջափակումը, նշյալ երկրների կողմից Վրաստանի տնտեսության ուղղակի նվաճումը, ՀՀ-ի համար տարանցիկ սակագների խիստ բարձր լինելու հանգամանքը և այլն: Եվ այս ամենը, բնականաբար, կներկայացվեին ռուս-թուրքական ավանդական սիրախաղերի համապատկերի վրա, որոնց հարող Վրաստանի ռուսամետ իշխանությունները ևս ՀՀ և հայության համար նույնքան հանցագործ են, որքան Թուրքիան, Ադրբեջանը և Ռուսաստանը:

Կրքերի թեժացման այս մթնոլորտում մերօրյա սահակաշվիլիաֆիլ երեսփոխանները ՀՀ խորհրդարանի ամբիոնից հանդես կգային կրակոտ ելույթներով, բնականաբար, անխնա դատապարտելով Վրաստանի ռուսամետ իշխանությունների հակահայ արարքները: Նրանց ձեռքերին կտեսնեինք Վրաստանում արգելված ու ՀՀ-Վրաստան սահմանային անցակետերից հետ ուղարկված մի շարք դասագրքեր ու գեղարվեստական գրքեր, որոնք կթափահարվեին խորհրդարանի ամբիոնից` ի ցույց աշխարհի և ի խայտառակություն Վրաստանի: Ինչ վերաբերում է իրենց գործընկեր Շ. Թորոսյանի մուտքի արգելքի խնդրին, ապա, անխոսք, վերջիններս այն կսարքեին միջպետական սկանդալի թեմա:

Մերօրյա սահակաշվիլիաֆիլների շրջանում առկա համացանցային պայքարի առաջամարտիկները ևս պարապ չէին նստի և այսօրվա Վրաստանի հաջողությունները թմբկահարելու փոխարեն հազարավոր օրինակներ կբերեին Վրաստանում իրականացված բռնություններից, Ջավախքի կրթական, մշակութային և հասարակական կյանքի մի շարք այլ ոլորտներում առկա ծանրագույն խնդիրներից, կհրապարակվեին այդ փաստերն ապացուցող մի շարք լուսանկարներ, մեկնաբանություններ և այլն, և այլն: Համացանցային հերոսների այս քննարկումների արդյունքում, բնականաբար, Վրաստանի և ՌԴ դեսպանատների բակերը պարբերաբար կվերաճեին զանգվածային բողոքի վայրերի:

Եվ այսքան բանը կարվեր մերօրյա սահակաշվիլիապաշտների կողմից, եթե Վրաստանի իշխանությունները, սկսած Սահակաշվիլիական տարիներից, լինեին ռուսամետ կամ ռուսական դրածո:

Ափսոս, հազար ափսոս, որ Վրաստանի իշխանությունները ռուսամետ չեն:

Վահե ՍԱՐԳՍՅԱՆ

 

 

Լրահոս
Հայ֊ադրբեջանական սահմանին ականի պայթյունից բնակիչ է վիրավորվել Հայաստանը Չինաստանի ավանդական գործընկերն է. ՉԺՀ Պետխորհրդի վարչապետը շնորհավորել է Նիկոլ Փաշինյանին Զոհրաբ Մնացականյանը և ԵԱՀԿ Մինսկի խմբի համանախագահները մտքեր են փոխանակել ՀՀ և Ադրբեջանի ԱԳ նախարարների առաջիկա հանդիպման վերաբերյալ Կառուցվածքային փոփոխությունների արդյունքում ՊԵԿ-ում աշխատանքից ազատվել է 128 աշխատող Դավիթ Անանյանը հորդորում է «Գազպրոմ Արմենիա»-ում ՊԵԿ-ի ստուգումները չկապել գազի գնի հետ Տիգրան Գրիգորյանը նշանակվել է Երևանի առաջին ատյանի ընդհանուր իրավասության դատարանի դատավոր ՀՀ նախագահի հրամանագրով Մհեր Գրիգորյանը և Տիգրան Ավինյանը նշանակվել են փոխվարչապետ Պարոնայք նորընտիր պատգամավորներ, Ձեզանից առաջ էլ է կյանք եղել, ձեզանից հետո էլ է լինելու. Արտակ Զաքարյան ԿԳՆ-ն սահմանված 30-օրյա ժամկետում չի կայացրել համապատասխան վարչական ակտ, և ԵՊՀ ՈՒԽ կանոնադրությունը Oրենքի ուժով համարվում է հաստատված. ԵՊՀ ՈւԽ Իրանագետ. Անփորձությունը չի կարող արդարացում լինել Ապրում ենք մի դարում, որտեղ նորարարությունները կառավարում են աշխարհը Համապատասխան տեխնիկական հնարավորություն ունեցող ցանկացած ՀԴՄ կարող է հաշվառվել որպես նոր սերնդի ՀԴՄ Մոսկվան 2019 թվականին առաջընթաց է ակնկալում ԼՂ հակամարտության կարգավորման գործում. Լավրով Ուսանողների ուսման վարձը ամսական վճարելու հնարավորություն է ստեղծվում Երուսաղեմի նորընտիր քաղաքապետն այցելել է Հայոց պատրիարքարան Արմեն Աշոտյան.«Երբ հերթը հասնում է Նիկոլ Փաշինյանի մերձավոր շրջապատի ախորժակները բավարարելուն, դրանից բարձր գումարներ պետական բյուջեի հաշվին գտնվում է» Փարիզում մեկնարկել է Զոհրաբ Մնացականյան-Էլմար Մամեդյարով հանդիպումը ՀՀ նախագահն արաբական ՄՈՒԲԱԴԱԼԱ ներդրումային ընկերության տնօրենին առաջարկել է ճանաչողական այց կատարել Հայաստան Հրանտ Մելիք-Շահնազարյան. ««Ոսկանապատ» վերլուծական կենտրոնն ընդլայնում է իր գործունեությունը» Հայտարարություն՝ Սորոսի հիմնադրամի կողմից իմ դեմ նախապատրաստվող սադրանքի և դրանից առերևույթ քրեական հոդված ստանալու` նրանց ցանկությունների մասին Ելույթս չեմ կարող կառուցել՝ նկատի առնելով՝ ում որդին է դահլիճում. Բաբաջանյան Վիճաբանություն ԱԺ-ում. ԲՀԿ-ականը հունից հանեց Մարուքյանին Փարիզում մեկնարկել է Զոհրաբ Մնացականյանի հանդիպումը ԵԱՀԿ ՄԽ համանախագահների և Անջեյ Կասպրշիկի հետ Early Warning նախագիծը Թուրքիան ներառել է զանգվածային սպանությունների առումով բարձր ռիսկայնության երկրների տասնյակում Հովհաննես Իգիթյանի կարծիքով` Հայաստանի արտաքին քաղաքականությունը նույնը մնալով՝ նոր մոտեցումներ է ձեռք որդեգրել Մեկնարկել է ԱԺ քառօրյայի հերթական նիստը. ՈՒՂԻՂ Թերեզա Մեյի խայտառակ պարտությունը. Բրիտանիայի խորհրդարանը մերժեց «Բրեքսիթի» գործարքը ՀՀ տարածքում կան դժվարանցանելի ավտոճանապարհներ. Վարդենյաց լեռնանցքը փակ է «Ժամանակ». Ինչո՞ւ է կտրուկ վատացել Ռուբեն Հայրապետյանի առողջական վիճակը «Հրապարակ». Լենան չի ուզում ասոցացվել Արփինեի հետ «Ժամանակ». Մանվել Գրիգորյանը ցանկանում է մեկնել Ֆրանսիա «Ժողովուրդ». Չի բացառվում, որ Սասուն Խաչատրյանին կրկին ուղարկեն արձակուրդ, այս անգամ՝ անվերադարձ «Հրապարակ». ՊԵԿ-ը «լուրջ» ակտեր է գրել Ծառուկյանի անվան հետ կապվող գազալցակայաններում «Ժամանակ». Փաստաբանին վիրավորելը կամ սպառնալը կքրեականացվի՞ «Ժողովուրդ». Մեծ բիզնեսների տեր Ղուկասյանը դիմելու է ԱԺ՝ տան վարձավճարի փոխհատուցման համար «Հրապարակ». Փաշինյանը «Իմ քայլը» դաշինքի հետ քննարկել է ԼՂ հարցը ՕՐՎԱ ԽՈՐՀՈՒՐԴԸ: Հունվարի 16 Արփինե Հովհաննիսյան.«Օրենսդրական նախաձեռնության առաջարկ՝ ներման հրապարակայնության մասով» Գորիս-Սիսիան ճանապարհին և Վարդենյաց լեռնանցքում բուք է Պաշտոնական Մոսկվան Բաքվում ՌԴ քաղաքացիների նկատմամբ խտրական վերաբերմունքի մասին գրություն է ուղարկել Ադրբեջանի դեսպանատուն
Խմբագրի ընտրություն
website by Sargssyan