ԱԺ հանձնաժողովը բացասական եզրակացություն տվեց ռեյտինգային ընտրակարգը վերացնելու մասին նախագծին
Նմանատիպ
Ազգային ժողովի պետական-իրավական և մարդու իրավունքների պաշտպանության մշտական հանձնաժողովը բացասական եզրակացություն տվեց ռեյտինգային ընտրակարգը վերացնելու մասին «Ծառուկյան» խմբակցության ներկայացրած օրենքի նախագծին:
Ընտրական օրենսգրքում փոփոխություններ կատարելու մասին օրենքի նախագիծը քվեարկության դնելուց առաջ հարակից զեկուցող, ԱԺ փոխնախագահ Արփինե Հովհաննիսյանը և հանձնաժողովի նախկին նախագահ, ՀՀԿ խմբակցության պատգամավոր Հրայր Թովմասյանը նախագծի հեղինակ Նաիրա Զոհրաբյանին առաջարկեցին ետ վերցնել նախագիծը, սակայն վերջինս հրաժարվեց և պահանջեց այն քվեարկության դնել:
Նիստը նախագահող, պետական-իրավական հանձնաժողովի և մարդու իրավունքների պաշտպանության մշտական հանձնաժողովի փոխնախագահ Ռուստամ Մախմուդյանը հայտնեց, որ նախագծի վերաբերյալ բացասական եզրակացություն է տվել նաև կառավարությունը:
Նախագիծը դրվեց քվեարկության, որին դրական եզրակացություն տալու մասին հարցին դեմ քվեարկեց 9, կողմ 5 պատգամավոր: Ռուստամ Մախմուդյանը հայտարարեց, որ հանձնաժողովը բացասական եզրակացություն տվեց Ընտրական օրենսգրքում փոփոխություններ կատարելու մասին օրենքի նախագծին:
Հետևեք մեզ նաև Telegram-ում